Vawiin chawhma dar 11:00AM khan Pu Hiphei, Speaker, Mizoram Legislative Assembly chuan a bial (Palak Constituency) chhunga Model Village atana thlan Serkawr khua-ah Model Village atana thlan lawmna leh Lungphum hawnna programme chu khuallian niin a hmanpui.

He Model village lawmna programme-ah hian thu sawiin, Pu Hiphei chuan Deputy Speaker te, Minister te leh MP (Rajya Sabha) te a ni chhung khan, Serkawr khua mipuite thil duh ber BDO Office leh Police outpost te chu Serkawr khuaah a dah thei lo va, a chhan chu Serkawr khaw bul lawka awm Tuipang khua-ah a awm tawh vang a  ni, a ti. Speaker chuan Serkawr khua tan hian thil chhenfakawm tak eng  emaw tal tih hi a duh hle thin laia, Saansad Adarsh Gram Yojana hnuaia a bial chhung atanga Model Village thlan tur a ni tih a hriatin, Serkawr khua chu a rilrua khua thlan tur chiangsa a ni, a ti.

Pu Hiphei chuan Mara Ram thim a ta, eng a min hruaichhuaktu kan missionary te thuthmun leh an lu nghahna hmun a ni a. Kum 1907-a kan missionary RA Lorraina’n Serkawr khua leilung a rah hmasak ber tuma a thusawi hmasak ber chu THO LA ENG RAWH, tih a ni a. Mara ram hmasawnna lamtluang zawha hmalam kan pen zelna tur hi Serkawr khua atanga a intan a rin tlat thu sawiin, Model Village aSerkawr khua thlan a ni chu, chutiang kawnga rahbi kan tukna pawimawh tak a ni, a ti. Pu Hiphei chuan Serkawr khua mipuite pawhin an khua hi Mara ram tan chuan kan Jerusalem a ni tih hre reng tur leh kawng engkima khawdangte entawn tlaka nung turin a chah hlawm bawk a ni.

He Model Village lawmna programe-a khualzahawm Pu RT Zachono, CEM,MADC chuan Serkawr khua mipui chu a lawmpui thu sawiin, Model village tih tlaka tan la turin a khaw mipuite a chah ve bawk.

Vawiin programme hi MADC hruaitute, Saiha District-a Head of Office te, Print leh Electronic media te leh Saiha District-a Prominent Citizens thahnem takin an chhim a ni.