Vawiin chawhnu dar 1:00Pm khan Siaha District Circuit House-ah District Level Committee on VAGY( Vidhyak Adharsh Gram Yojana) ten meeting an nei. He meeting hi Siaha District VAGY Chairman Pu Hiphei, Hon’ble Speaker Mizoram Legislative Assembly leh Co- Chairman Dr.K.Beichhua ten kaihruaiin, VAGY committee member te an tel kim hle a ni.

Vawiin meeting-ah hian Siaha District chhunga Model Village pahnih, Saikao leh Tisôpi khuaa sawrkar hmalak tawhna leh hmachhawp hrang hrangte thlir ho a ni. Saikao khua hi Pu Hiphei bialchhunga awm niin, Tisôpi khua hi Dr.K.Beichhua bialchhunga awm a ni vethung. Saikao khuaah hian Village Council 3 awmin, Tisôpi khuaah erawh chuan Village Council pahnih a awm a.

Vawiin meeting-ah hian he Khaw hnih atanga VCP 5 ten an khawchhunga sawrkar hmalak tawhna te, hmalak la tulna hrang hrang te report pein, khawtlang mipui leh VC ten Model Village nih tlak khua nitura an hmalakna te pawh an tarlang bawk. Meeting-ah hian Saikao khuaa High school in Headmaster rei tak a neih tawh lo thu te, Peon/IV Grade phei chu kum 10 chuang an neih tawh lo thu te, VFA kum 20 chuang an nei tawh lo thu te, Aganwadi awm lo thu te, Tisôpi khuaa inkal pawhna kawng tha awm lo thu te, Sub-centre awm lo thu te, Community Hall leh VC court House siamthat ngai te tarlan tel a ni. Vawiin meeting-a VCP te report atangin, Saikao leh Tisôpi khua te chuan Model village atana puan an nih atangin Faina kawngah hma nasa taka an sawn thu hriat a ni.

VAGY committee member hrang hrang ten an department theuh hmalak tawhna leh hmachhawp te meeting-ah hian report an pe a. Vawiin meeting hian Hriselna leh Zirna lam changtu ber Chief Medical Officer leh District Education Officer te VAGY committee member a tel ve lo chu remchang lo riau vin a hria a, member-a telve tawh tura thuneihtute hnena rawtna thlen turin an rel. Chairman leh Co- chairman te chuan Sawrkar official te chu an theihna zawn theuhah thahnem ngai taka thawk turin an ngen a, VCP te chu Sawrkar official te tawiawm tha tur leh finchhuah thin turin an chah hlawm bawk a ni.