Nimin MHIP Day vawi 42 na chu Nisapui Branch MHIP te tan Ruby Jubilee a nih angin Nisapui YMA Hall ah lawm a ni a. Bialtu MLA Pu Hmingdailova Khiangte, Parliamentary Secretary nibawk chuan khuallian niin a hmanpui.

MHIP Day lawmna Nisapui Branch MHIP President Pi Lalnunengi  kaihruai ah hian  Pu Hmingdailova Khiangte chuan thusawiin MHIP din chhan Hmeichhe dinhmun chawikan leh hmeichhe awmnem zawkte dimdawi taka enkawl hi hnam changkang apiangin an ngaipawimawh a ni  a ti a. Kan ram leh kan hnam humhalh a pawimawh zia leh kan ram chhung ngeiah hnam dangten kan thawh peih loh thawkin kan sum tam tak min lak sak reng a ni tih hre thar a, tuna tang chuan kan ram, kan hnam chhan nan engmah thawh hreh nei lova tan lak a hun tawh takzet a ni tiin fuihna thu a sawi. AIDS natna hlauhawm zia hre thara a darh zel tur venna kawngah tanlak a pawimawh zia a sawi bawk.

Pu Hmingdailova hian Nisapui MHIP te hnenah hian PA set tha tak leh No thahnem tak a pe a. Mizo Customary Law bu 1 ve ve Nisapui Branch YMA leh MHIP te a pe bawk a. MHIP Day lawmna hi chhun lamah hun hlimawm tak tak an hman hnuin zan lamah a lawmna ropui ber hi hman a ni.