No.6152/2020-2021

Vawiin October ni 16, 2020 (zirtawpni) khan Pu H.Lalengmawia IAS, Health Secretary chuan Darlawn PHC Building sak lai mek a hmunah kalin a enfiah.

Health Secretary Pu H.Lalengmawia, IAS hi Darlawn PHC thawktute leh Darlawn Village Level Task Force hruaitu ten an lo dawngsawng a. Tin, Sakawrdai CHC hruaitute bakah Darlawn MHIP leh MUP hruaitute nen pawh inkawmhona hun tha tak an hmang bawk. Secretary chuan Darlawn PHC chu khawtual mai bakah a chhehvel atanga pantu tam tak nei a nih avangin sawrkar pawhin a ngai pawimawh em em a. Theih tawp chhuah a tih changtlun chhoh zel pawh a tum a ni a ti.

Kan tunlai hrileng chungchang pawh sawi langin COVID-19 dona kawnga Darlawn tlangdung inpekna chu lawmawm a tih thu sawiin lungrual taka ke penho zel turin a chah a. Health Department thawktute nena inpawhna tha tak nei zel tura a duh thu a sawi a. Harsatna an neihte pawh inthlahrung hauh lova sawrkar hnena thlen zel tura a duh thu sawiin an lakah sawrkar pawh a inhawn reng thu a sawi bawk.

Health Secretary hi vawiinah vek Aizawl-ah kir lehin Khawruhlian PHC thawktute mamawh a enpui leh nghal bawk a ni.