Nimin khan Mizoram Food Park, Chingchhip-a thei leh thlai vawn thatna Cold Storage and Adjoining Facilities, cheng nuai 217 senga buatsaih chu Finance Minister Pu H.Liansailova’n a hawng.

Hawnna inkhawm-ah thu sawiin Pu Liansailova chuan kum 10 kal ta a Cold storage lungphum, a taka tih puitlin a lo ni ta chu hmasawnna lawmawm tak a ni, a ti a. Mizoram sorkar-in sum tam tak sengin Chhingchhip khua chu thei vawn thatna leh sawngbawlna tur hmunhma leh a hmanraw pawimawh te nen a thuam a, hna thawk thei turin MIFCO pawh tuai thar a ni a. Cold storage leh facility dang te chawm thei turin Chhingchhip khaw mipui te chu an inbuatsaih a, sorkar duhsakna chu rinawmna nen an chhan let a beisei tih a sawi a. Ram leh hnam din thar leh turin Mizo mipui ten awlsam taka sum hmuhna rilru bansan a, a taka thawh a hun tak zet tih sawiin Pu Liansailova chuan tih tak zeta hma la duh tan NLUP leh Horticulture Technology Mission hnuaiah te hma lak theih tam tak a awm tih a tarlang a. NLUP tanpuina sum chu patling rilru nei tan chuan chhungkaw eizawnna atana tangkai tham a ni, tiin sum pek chhuah chungchangah sorkar chuan a tih tur a ti a, a taka mawhphurhna hlen chhuah chu a dawngtute rinawmna ah a in nghat a ni, a ti a. Mizoram Food Park leh a chhunga facility hrang hrang te chu tangkai taka hman a nih theih nan neitu chan chang a, khaw thenawmte tih hmuhtu ni turin Chhingchhip khaw mipuite chu a chah a ni.

Mizoram thei leh thlai thar chhuah vawn that leh sawngbawlna tura hmalakna a zuih ral loh nan Mizoram sorkar-in theihtawp a chhuah a. MIFCO khai chhuah nan hian NLUP Implementing Board hnuaiah pawh nasa taka hma lak a ni. Nimina hawn thar, Cold Storage hi cheng nuai 164 senga sak a ni a; chhawng thumah thenin thei, thlai leh sa lam chi te 777MT lai dah theih tura buatsaih a ni a. A tih vawh nan Germany leh France kutchhuak refrigiration hmanrua hman a ni a. RAC Equipments India Pvt. Ltd Gurgaon in a khawl hi an bun a ni. Cold Storage rual hian Electronic/Digital Truck Weigh Bridge leh 1000MT bungraw dah theihna Warehouse 2 dah thar a ni bawk a. Hengte nen hian Mizoram Food Park chu changtlung taka buatsaih chhoh mek niin Industries Department leh MIFCO ten a enkawl hna hi an thawk dun a. Tuna food processing factory awm sa bakah mi hrang hrang hnenah hman hawhtir theih turin a dang 20 buatsaih mek a ni bawk.

Hawnna inkhawm hi MIFCO Chairman, Pu C.Lalruata’n a kaihruai a. Bialtu MLA Pu K.Lianzuala leh Pu P.C.Lallawmsanga MIFCO Managing Director te pawhin thu an sawi a. Mizoram Food Park Project Manager Pu Sangzuala’n technical report a pe bawk a ni.

Chhingchhip kalkawngah hian Pu Liansailova chuan Baktawng-a NLUP hnuaia Horticulture hmalakna, Aloe Vera herna a tlawh a. Baktawng-ah hian Aloe Vera thlangtu chhungkaw 46 awmin Society mumal tak an indin tawh a. Nikum November 2 a hawn, Aloe Vera herna factory ah hian an thar chhuah te chu herin litre 1 Rs. 300/- in an hralh chhuak tan vek mek a ni.