Sorkar laipui Ministry of Housing & Poverty Alleviation (MHUPA) bultum, khawpuia mirethei BPL chhungkua 142, chenna tur in nei lo te tana in sakna tur Rajiv Awas Yojana (RAY) Pilot Project tanna tur cheng nuai 1120 chu zoaMHUPA hnuaia thuneitu Central Sanctioning and Monitoring Committee (CSMC) chuan nimin (11.9.2012) khan Mizoram project chu a pawm (approved) ta a ni. Mizorama RAY pilot project pawm tak hi hmar-chhak state zingah chuan a hmasa ber a ni.

RAY pilot project pawm tak chungchangah hian Delhi-a cham mek Urban Development & Poverty AlleviationMinister Pu Zodintluanga chuan, “He project hlawhtlin theihnan hian UD&PA Department-a hnathawktuten theihtawp an chhuah a, hun tepter tak karah hna thawkin office chawlhah te pawh office kai zak zakin hna an thawk a, tunah an hnathawh rah kan hmu thei mai hi a lawmawm hle a, North east state zingah phei chuan Mizoramin state dang hmakhalhin kan project min approve hmasa ber a ni,”a ni a ti.

Pu Zodintluanga chuan, “RAY pilot project hi a bul tan nan Zuangtuiah hma kan la tan phawt ang a, nakinah lian leh zau zawkin Aizawl khawpui hmun hrang hrang remchangah leh Lunglei khawpuiah kan chhunzawm dawn a. Khawtlang hruaitu tam takin RAY project hi an khawtlang leh venga kalpui a nih ve theihnan min rawn dawr tawh a, hma zau zawka la turin kan officer leh staff te pawhin an bawhzui mek a ni. RAY pilot project CSMC-in min approve mai theihna chhan pawh hi Ministry of Housing & Poverty Alleviation hnuaia project pawmtu Central Sanctioning & Monitoring Committee (CSMC) hi Mizoramin an ministry project tha taka kan kalpui vang a ni. Anmahni ngei Mizoramah lo kalin district hrang hranga mirethei in sak hna kan thawh chu an rawn enfiah a, kan hnathawh danah an lungawi hle a, Mizoram tihdan chu India ram tan pawh ‘model’ a tlin thu an sawi a ni tiin, tun tumah pawh hian RAY pilot project chungchang presentation nei turin CSMC hian Mizoram chu min ko a, kan project hi Pu RL Rinawma (IRS), Principal Secretary, leh Pu K. Lalthawmmawia (MCS), Director, UD&PA, Govt of Mizoram ten nimin khan an va present a, CSMC chuan tha tiin an lo pawm ta a ni,” a ti.

RAY project hi India ram khawpui hrang hranga slum area (khawpui tawp leh awmze nei loa chenna) thenfai nan leh mirethei in sakna nei loten chenna in an lo neih ve theih nana duan a ni a. Mizoramah pawh he project hi kalpui ve niin khawpui lian pahnih Aizawl leh Lunglei-ah hma lak mek a ni. A bul tannan RAY pilot project hi Zuangtui, Aizawlah kalpui tan a ni ang.