Mizoram Upa Pawl Diamond Jubilee lawmna programme chu vawiin khan Chaltlang Lily Veng Upa Pawl Unit te’n Parliamentary Secretary Pu Hmingdailova Khiangte, an Adviser ni bawk hovin an hmang a. Pu Hmingdailova Khiangte hian Diamond Jubilee lungphun a hawng a ni.

Pu Hmingdailova Khiangte chuan Lily Veng MUP Unit member-te chu an tu leh fate tana malsawmna an nih piah lamah khawtlang tan rohlu an ni, a ti a. Chaltlang Lily Veng hmasawnna atan tha thlah lova, an ngaihtuahna seng chhunzawm zel turin a sawm a ni.

Lungphun hawnna an neih zawh hian Pu Hmingdailova Khiangte inah function tawite an hmang a. He hunah hian an member kum 90 tling - Pu Kawlhlira leh Pi Lalzuii te lawmpuina an hlan bakah an Adviser Pu Hmingdailova Khiangte chu sawrkar dinhmun pawimawh a chelh avanga lawmpuina parthi an awrhtir bawk.

Mizoram Upa Pawl hi kum 1957, January ni 4 khan a lo ding tan a. Mizoram hmun hrang hrangah Unit neiin heng Unit tin te hian an remchan dan angin Jubilee lawmna programme hi an buatsaih a ni.