Vawiin khan Pu Lal Thanzara, Minister for Health, I&PR, etc.. chuan kum 2016 chhunga PWD hnathawh te thlirletna hun E-in-C Conference Hall, Tuikhuahtlang a buatsaih chu a hmanpui a. He hunah hian kum liamta chhunga PWD hmalakna hrang hrang te thlir let niin kum in chhunga hnathawh dan tur te sawi ho a nih bakah chak zawka hmalak a nih theihna tura infuihtharna neih a ni.

PWD hnathawkte mawhphurhna pawimawh zia tarlangin Pu Lal Thanzara chuan ram hmasawnna ruhrel pawimawh tak tak zingah inkalpawhna chu ngaihpawimawh hmasak tur leh thlahthlam remchanglo a ni a ti a. " Social Media lamahte kan hna thawh that leh that loh te chu kan thawh lai la la in ram pum hriat a puanzar nghal zel anih tak zel avangte hian, tun hma ai khan kan mawhphurhna hi a sangta in, tun hma ai khan kan hnate pawh kan uluk alo ngai zual ta hle ani tih hi kan inhriat a ngai ta a ni", a ti a.

PWD hnuaia Engineer rual te chu neitu thinlung pu tur leh mipuite tana kawngpui tha siam sak chu an bat ani tih inhre thar turin a fuih a. Working season reilote pawh hlawk taka hman a nih theih nan contractor te uluk zawka vil thin tur leh hnathawhna hmun te vawi tam zawk tlawh thin turin a chahin Contractor hna chhia ah contractor te ang thovin a viltu tura ruat engineer ten mawh an phur tel a ni a ti.

Pu Lal Thanzara chuan,"Sum tam tak senga kan kawng siam te'n kum khat pawh a daih hlei thei lote leh, side drain kan siam that tawk loh vanga kan pave­ment work-te a tlo hlei thei lote leh, tun hma a kan hmuh ngailoh motor ke 12 leh a aia tamte'n an rah chhiat theih loh khawp a tha kawng siam turin Engineer kan nihna angin, a damdawi zawn chhuah lamah kan thluakte tun ai hian i vawrhvir nasa leh zual teh ang u. DPR kan siamte hian dawhkan atanga duh dah deuh a siam mai lo in, ngun tak leh uluk takin DATA lakkhawm leh survey-te hi ti ila, Revised Estimate siam ngai fote hi pumpelh tumin tan lo la ula". Paper work neih chhuan lama site visit leh, supervision tih loh phah hi a thiang lo ani tih in hriat thar leh ka duh", ti in Sawkar Engineer te chu tan la zual sauh turin a chah a ni.

PWD hnuaia hnathawh te thlirletna hun hi Pu Lalram Thanga, Principal Secretary, PWD in a kaihruai a. He hunah hian PWD annual Report, 2015-16 chu Minister Pu Lal Thanzara chuan a tlangzarh nghal a.Ni 2 awh tur Review meeting ah hian Roads, highways leh buildings enkawltu Chief Engineer 3 ten power point presentations hmangin PWD hnuaia hnathawh tawh te an tarlanga; sawihona hun pawh neih nghal zel a ni. Er. R.Vanlaltluanga, E-in-C, PWD in report tawi a pek dan chuan PWD hian kawngpui 7000 Km aia thui, building 3098 leh lei(bridges) 124 a enkawl mek a. E-in-C office, Circle 10, Division 29 leh Sub division 82 ah PWD hnathawk te hi an in zar pharh a ni.