Mizoram Governor Lt Gen Nirbhay Sharma, Mizoram Governor Lt Gen Nirbhay Sharma, PVSM, UYSM, AVSM, VSM, (Retd) chuan December ni 31, 2016 khan Shri Vedic Mission Trust buatsaih ‘19th Rashtra Katha Shivir’ Gujarat-a Pransla, Rajkot District-a neih takah Gujarat Governor Pu OP Kohli nena tel tura sawm an nih angin he hun hi an hmanpui a. Shri Vedic Mission Trust hi India ram hnamzia leh chanchin hlui ropui tak takte zirchiang a, khawvel changkang zelah India-in nasa taka culture, science leh technology lama a thahhlawk dante an phochhuak thin a. Kumina ‘Rashtra Katha Shivir’ah hian India ramchhung zirna in hrang hrang atangin zirlai 15000 lai an tel a, heng zirlaite bakah armed forces, paramilitary, coastguards leh NDRF aiawh engemawzat an tel a ni.

Mizoram Governor chuan thu sawiin India chu thalai tamna ram a nih avangin ramchhung thalaite thiltihtheihna leh thawhrimnaah ram hmasawnna pawh thui tak a innghat tlat a, chuvangin thalaite hmakhua ngaih leh chhawrtlaka chherchhuah hi kan tihmakmawh a ni, a ti. Governor chuan thalai kalkhawmte fuihin ramchhung chanchin zau zawka hriat tum turin a hrilh a, ramchhunga hnam hrang hrang awmte nena inpawhna leh inunauna siam thiam a pawimawh hle a ni, a ti bawk. India hmarchhak bial chuan rampum zau zawng zaa 8% a luah avangin ram thanlen zelna turah pawh helai bial hi a pawimawh hle a, amaherawhchu inkalpawhna tha leh hmasawnna kalpui chak theih tawk lohna bial a nih avangin duhthusawmin a changkan theih lo thu a sawi a. Mizoram chungchang tarlangin culture lamah hausa tak a nih thu te, ziak leh chhiar thiam ‘literacy rate’ san thu te, inthliar hranna awmlo ‘classless society’ a nihna te leh state ralmuang ber a nih thute a sawi a. Nakin lawkah chuan India leh Southeast Asia insumdawn tawnna turah Mizoram chu kawngkapui ber a la ni dawn a ni, a ti bawk. Vedic Mission Trust-in India ram ropuina chhawmnun zelna hna an thawh chu fakin Governor chuan khawvel pumhuapa India chanchin ropui tak takte phochhuaktu an nihna ah an hnathawh chhuanawm hle a tih thu a sawi bawk.

Mizoram Governor nupui Pi Jyotsna Sharma pawhin thusawiin zirlai kalkhawmte chu an nunah beidawng mai lova tumruhna nen kal zel turin a fuih a, hmalam hun eng tak an neih theih nan theihtawp chhuah turin a fuih bawk.