Nimin khan Parliamentary Secretary leh Turial bialtu MLA ni bawk Pu Hmingdailova Khiangte chuan Kawnpui khua a faina leh thianghlimna kawng a bik takin bawlhhlawh paihna kawnga Swacch Bharat Mission hnuaia Clean Kawnpui Campaign chu Awithangpa Hall-ah hawnna programme a hmanpui.

Pu Hmingdailova Khiangte chuan faina leh thianghlimna kawnga Sawrkarin Swacch Bharat Mission hnuaia a hmalakna leh ruahmanna a neih leh kalpui mekte leh he programme in a tum te sawiin Kawnpui chu Mizorama khaw fai leh thianghlim ber anih theih nan mitin tan la a, khaw entawntlaka siam turin he huna mipui kalkhawmte chu a chah a. Mizo chu intih hmuh ching hnam kan nih avangin faina kawnga tih takzeta tan kan lak chuan nasa takin hma kan sawn thei a ni, a ti a.

Programme kaihruaitu SDO(Civil) Dr. Arun T. chuan bawlhlawh paihna kawnga UD &PA Department leh Kawnpui a Village Council pathum hruaitu te thawhho dan leh faina a pawimawh dante a thusawiah a tarlang a. Clean Kawnpui Campaign Secretary Pu H. Lalmuanpuia hnen atangin report tawi ngaihthlak a ni bawk. Hemi hnu hian Parliamentary Secretary chuan bawlhhlawh khawnkhawm sa motor panga a dah chu bawlhhlawh paihna hmuna paih turin a vailiam a ni.

Clean Kawnpui Campaign-ah hian in tin atangin bawlhhlawh khawnkhawm a, motor hmangin a paihna tur hmun buatsaih a paih tum a ni a. In tin atangin thla tin cheng 20 khawn a ni dawn a, hei hi Village Council te hian an buaipui dawn a ni. Bawlhhlawh paihna hmun tur pawh hi buatsaih fel ni tawhin an khaw chhunga tumahin kawr leh khaw tualah bawlhhlawh leh hnawmhnawk paih lo turin ngenna an siam bawk a ni.