Vawiin khan Tuirial A/C bialtu MLA Pu Hmingdailova Khiangte chuan Kolasib Parish Hall ah Chief Minister's Rural Housing Scheme a hawng.

Khuallian chuan NEDP chu Mizoram Sawrkarin hmasawnna chi hrang hrang a tana ruahman a nih thu sawiin kuminah NEDP a atan cheng vaibelchhe 1000 sawrkarin a dah thu a tarlang a ni. NEDP chu hmasawnna hna chi hrang hrang a tana pawhpen theih a nih thu sawiin CM Rural Housing Scheme pawh chu mi harsa insa pum hleitheilo te tana duan a nih thu a sawi a. He Scheme hnuaia tanpuina dawngtu tur thlan chungchangah mahni chhungte leh hmelhriat tha te duhsak mai lovin a mamawh tak tak te ina an dawn ngei theihnan beneficiary thlan chungchangah rinawm taka kalpui tha a tih thu a sawi bawk a ni. Khuallian chuan Sawrkar ina insak chungchanga thingtlang lam mi harsa zawkte tanpui a tum ang ngei in CM Rural Housing Scheme chu hlawhtling taka kalpui a nih theih nan kalkhawm mipuite chu duhsakna a hlan bawk a ni.

Pu Lalnunhlua, Project Director, DRDA Kolasib chuan CM Rural Housing chungchang hi sawifiahin, he Scheme hnuaia tanpuina dawng thei tur te chu Housing Scheme dang PMAY etc hnuaia tanpuina la dawnglo te an nih thu a tarlang a, insak tanpuina hi chhungkaw pakhat tan cheng 50,000/- niin hei hi tum thum (3 installments) a dawn tur ani a tum khatna ah 30%, tum hnihna ah 40% leh tum thumna ah 30% a sem tur a nih thu a tarlang a, insak tanpuina dawngtu te chuan an mahni ngeia kut an thlak a ngaih thu tarlangin a theilo tan chuan VC emaw tlawmngai pawl dangte puihbawmna in kut thlak tur a nih thu a sawi bawk a ni. He hunah hian CM Rural Housing Scheme hnuaiah District hrang hrang atangin tanpuina dawngtu tur chhungkaw 2000 thlanchhuah tur an nih thu leh Kolasib District huam chhungah chhungkaw 167 in tanpuina an dawn tur thu tarlan bawk a ni. Tanpuina dawngtu tur thlang tur hian Village Level ah Gram Sabha koh ani anga mipui kalkhawm te'n tanpuina dawng awm nia an hriat an thlan hnuah VLA ten endikin hei hi District Level a Selection Committee Bawrhsap kaihhruaina hnuaiah PD, DRDA (Member Secretary), te nen thlitfim leh tur a ni.

CM Rural Housing Scheme hawnna inkhawm hi Pi C.Lalduhzuali, BDO Bilkhawthlir chuan lawmthu sawina in hun a khar a ni.