Inrinni zing khan Parliamentary Secretary Pu Hmingdailova Khiangte chuan Kolasib ah United Bank of India (UBI) Branch thar a hawng a. Bank hawnnaah Pu Hmingdailova Khiangte chuan Bank hrang hrang hnathawh dante sawiin Bank-te hian tunlai thiamna hmangin mipui tan awlsawmna tam tak – ATM card te, internet banking te, RTGS te an siamsak a, chungte chu mipuiin kan hmanthiam leh hman tangkai a tul a. Bank te pawhin hengte hi an customer tam thei ang berin an hmanthiam theih nan a kalhmang leh a hman dan te tun aia nasa leh zawka an zirtir leh an puanzar a ngai a ni, a ti. Banking hi sumdawnna anih thusawiin bank a thawkte chu engtik lai pawhin mipuiin tan dawr nuam an nih a tul a. Bank a thawk mi thenkhat te hi dawr harsa leh biak harsa tia sawi awm fo thin chu pawi tiin bank a thawkte a bikin mipuiin an dawr reng angte chu biak nuam, nachang hria leh hawihawmna tlacham lo an nih a ngai a ni, a ti a. UBI Bank thar hawn a thawktute chu an rawngbawl-sak mipuite tana dawr nuam tak ni turin a fuih.
Hawnna inkhawmah hian Family Guidance & Counselling Centre, Kolasib Venglai-a Councellor Rev. Samuel Lalrinsanga chuan hunserh hmangin, Pu C. Lalzahngova, Superintendent of Police, Kolasib pawhin thu a sawi bawk.
Kolasib-a UBI Branch thar hi India ram puma Branch 2007-na niin, Zirtawpni June ni 19 khan Branch 2006-na chu Mission Veng Bazar, Aizawl-ah hawn a lo ni tawh a. Thla leh chhung hian Mizoram hmun dangah Branch pahnih hawn leh tum a nih tur thu thawktute chuan an sawi. UBI hian Mizoram chhungah ATM Booth pasarih (7) an nei mek a, ATM Booth thar pahnih hawn tuma hma lak mek a ni bawk.
United Bank of India hi December ni 18 1950 khan India rama Bank pali (4) - Comilla Banking Corporation, Bengal Central Bank Ltd., Comilla Union Bank leh Hooghly Bank Ltd. te inzawmkhawmin an din a ni a. India rama metropolitan city langsar ber zinga mi Kolkata-a hmunpui nei an ni. Kum 1969 July ni 19 khan Nationalised Bank-ah puan a ni a, Chutih lai chuan UBI hian ram pumah Branch 174 chiah neiin, an sumdawnna pawh cheng vaibelchhe 269 chauh a ni a. Tunah chuan India ramah Branch 2007 awm tawhin, ATM Booth pawh 1960 lai an nei tawh a. An sumdawnna sum che vel pawh cheng vaibelchhe nuai hnih lai a tling tawh a ni.
Kolasib-a Branch hawn thar hi Cachar Regional Office, Silchar hnuaia awm tur a ni a. An hmalak tawhna langsar zual zingah UBI hian India hmarchhaka thingpui huan (tea garden) te chu sum leh paiah puiin, tun hnaia Prime Minister-in khua leh tuite tana hamthatna Scheme thar a siam - PM Jan Dhan Yojana hnuaiah pawh mipui nuai 52-in UBI-ah hian account an hawng tawh a, Rupay Card pawh pek chhuah vek an ni tawh a ni.
