Ramchhung hmun dangte rualin Mizoramah pawh vawiin khan Rampum huapa Faina leh Thianghlimna chungchanga Beihpui thlak na ‘National Sanitation Campaign’ hawn a ni. He Campaign hawnna programme PHE Department-in Vanapa Hall-a an buatsaih chu Parliamentary Secretary Pu Hmingdailova Khiangte in khuallian niin a hmanpui a, Campaign hi a hawng nghal a ni.

Pu Hmingdailova Khiangte chuan faina leh thianghlimna chungchanga National Sanitation Campaign-ina a thil tum te sawi langin hengte hi thil tih harsa a ni lova, mitinin kan ti thei a, faina leh thianghlimna kan ngaih pawimawh hian keimahni kan hrisel a, ram leh hnam hrisel kan ni thei a ni, a ti. Baktawng-a Pu Ziona Pawl ten kawng kama bawlhhlawh leh hnawmhnawk dangte an chhar a, an ak thin chu ropui a tih thu sawiin faina leh thianghlimna kawngah an hnen atangin zirtur kan nei tam hle in ka hria, a ti. Singapore chu ram tereuhte nichungin faina kawnga an hmalakna te chu a entawntlak hle a a hriat thu a sawi bawk.

Parliamentary Secretary chuan Mizoram chu ram chhung hmun dang nena tehkhin chuan kan fai hle a, Mizorama khaw 89 in khaw fai lawmman ‘Nirmal Gram Puraskar’ an dawng tawh chungin duhthu sam lohna leh hmalakna tur a la awm nia a hriat thu a sawi a. Faina leh thianghlimna chungchangah te, zun leh ek inthiarna chungchangah te, bawlhhlawh leh thli paih leh sawngbawl kawng te, tui in tur thianghlim taka kan vawn leh dah that kawngah te leh ei in lama tui thianghlim kan hmanna kawngah te hian hmasawnna tur kan la nei a, midangte hemi chungchang kan zirtir leh mahni pawh ina hengte a taka kan nunpui hi kan mawhphurna theuh a ni, a ti.

Pu R. Lalfanliana, Engineer-in Chief, PHE Department chuan National Sanitation Campaign in a thil tum te sawiin mipuite he ruahmanna hi tawiawm turin a ngen a. Pu C Lalremsiama. Chief Engineer, Zone –II, PHE Department kaihhruainna hnuaia he Campaign puala thuthiam chu a rualin he huna kalkhawmte hian an chham a ni.

He hunah hian Mizoram Drama Association in lemchan tawi hmangin faina leh thianghlimna a pawimawh zia an tarlang a, Government Aizawl West College leh Govt. Hrangbana College zirlai naupangten ‘ Sanitation-ah hian mipuite’n hma kan la nasa tawk a ni’ tih thupui hmangin Debate inelna an nei bawk.

National Sanitation Campaign hi Sawrkar Laipui Flagship programme thar tur niin Mahatma Gandhi piancham October ni 2 khian he programme peng khat ‘Mission Swach Bharat’ tih chu Prime Minister Pu Narendra Modi’n a hawng ang. Mission Swach Bharat in a tum ber chu October ni 2, 2019, Mahatma Gandhi a, pianchamphaphak vawi 125 a lo thlen ah, India ram chu ram thiangliam leh fai anih thei nan rampuma beihpui thlak a ni.

National Sanitation Campaign hian October ni 31 thleng a awh dawn a ni.