Vawiin khan Industries Minister puitu Parliamentary Secretary Pu Joseph Lalhimpuia chu Delhi-a Annual Conference of State Ministers of Textiles neihah telin, Mizorama textile industry hnathawkte tana hamthatna tur leh mamawhte a thlen.

He conference hi Pu Santosh Kumar Gangwar, Minister of State (Independent charge) chuan kaihruaiin, state tina Minister leh an aiawhte an kalkhawm a. Sorkar laipui hmalaknate sawihovin, state tina an kalpui dan leh harsatnate bakah quality tha zawk a thilsiamchhuah leh mi tam zawk rawih theih dan turte sawiho a ni.

He hunah hian Parliamentary Secretary Pu Joseph Lalhimpuia chuan Mizoram mamawh hrang hrangte thlenin, March ni 16, 2012-a Sorkar laipuiin Mizoram leh Nagaland-a Weavers’ Service Centre (WSC) din a lo tiam tawh chu tun thlenga Mizoramah din a la nih loh thu leh, a rang thei ang bera tihlawhtling turin a ngen a. Nagaland-ah chuan WSC dinna tur project hi phalna pek a ni tawh a ni.

Parliamentary Secretary chuan la rawng thlakna damdawi (dyeing chemical) lei dawna National Handloom Development Corporation-a pawisa pek lawk ngai ziah thin chu weaver-te tan harsatna a thlen thin avangin thlak danglam ni se, a ti a. Sorkar laipuiia project leh thildang kalpui dan phung- norms and criteria-te chu state te leh hnufual zawkte tan tlin a harsat thin thu a sawi bawk a. Hemi chungchangah hian Mizoram leh India hmarchhak state-te chu an tlin theih tawk (capacity) mil a criteria hran siamsak ni se, tiin Pu Joseph Lalhimpuia chuan a thlen bawk a ni.