Inrinni kalta khan Pu Hmingdailova Khiangte, Chairman Mizoram Youth Commission chuan Mission Foundation Movement (MFM) leh Japan International Cooperation Agency (JAICA) leh Mizoram State sawrkar tangkawp ten an buatsaih tur Community Health Clinic hmasa ber tur chu a hawng.

Hawnna thu sawiin Khuallian Pu Hmingdailova Khiangte MLA chuan Sawrkar chuan a mipui te tana thil tha leh chhenfakawm tam tak a ruahman thin a; mahse a hlawhtlinna leh a tangkai ber chu a hmangtu mipuite an ni a; mipui ten mawh an phur nasa hle a ni a ti. Khamrang leh a chhehvel khua te pawh hian he Health Clinic hi tangkai taka hman tur a ni a ti a. Mizoram Youth Commission hnuaiah Mizo ngei Cement Mistiri 300 zet an inziak lut a; mahse In sa tur ten Mizo Mistiri an ngaihtuah lova, Hnamdang Mistiri bawk an zawng leh thin a; hetiang rilru hi kalsan thei ila a duhawm a ni a ti. Khuallian chuan HIV in kan ram min chiah hneh tawh hle a; min Run a ni ber a; chuti chung pawha fimkhur nachang hre lo leh fimkhur duh lo kan awm reng chuan Mizo mipuite tan pawi kan sawi tihna a ni ang a ti bawk.

He CHC building thar sakna tur hian JAICA chuan cheng Nuai 71.17 a rawn tum sak dawn a; MFM in hnathawktu dahin Clinic mamawh te a ngaihtuah ang a; State Sawrkar Health Deptt chuan Sawrkar anga tih ngai te a ti thin dawn a ni. Building sak nan Khamrang Branch MHIP chuan an ram zau tak an pe fel tawh a. Health Worker thawk tur kum khat hlawh tur pawh Khuallian Pu Hmingdailova Khiangte hian a tum sak dawn bawk.

Hawnna Inkhawm Khamrang khawlai-a buatsaih hi Pu R Vanlalzauva, MFM Director chuan a kaihruai a; Pu Gordon Zohmingthanga Mission Director NRHM pawhin thu a sawi a ni.