Mizoram Youth Commission Chairman Pu Hmingdailova Khiangte, MLA chuan vawiin khan Lungdai BNRGSK Hall-ah kum 2011-2012 a Lungdai Higher Secondary School, Govt. Lungdai High School leh Snow White School ten result tha tak an neih lawmna hun Khuallian niin a hmanpui a, Lungdai khua zirlaite chu Education Industry tantu ni turin a sawm.

Lungdai zirna in hrang hrang atanga zirlai kalkhawmte hnenah hian Pu Hmingdailova Khiangte, MLA chuan Phai lam leh Mizoram ah ngei pawh college tha a lut thei tur chuan exam a pass mai ni lo, mark sang tak hmua pass a ngai tawh a. Chumi tur chuan zirlaite mai bakah zirtirtute leh nu leh pate kan zavaia tanrual a ngai a, khawtlang hruaitute pawhin mawh kan phur a ni, a ti a. Lungdai khuaa zirna in hrang hrang tan result chhuanawm tak tak an nei thei chu lawmawm a tih thu Pu Hmingdailova chuan sawiin, Lungdai khua hian Education Industry hi a tan thei a nih chuan khaw itawm tak a la ni dawn a ni, a ti.

Lungdai khuaa zirna in 3 (pathum) - Lungdai Higher Secondary School, Govt. Lungdai High School leh Snow White School te hi result tha tak an neih lawmpui nan bialtu MLA Pu Hmingdailova Khiangte, Mizoram Youth Commission Chairman ni bawk hian Computer full set a pe theuh a, inkhawm hi Pu K. Lalduhawma’n kaihruaiin khuallian hi RMSA Deputy DPC Pu Lalramhluna’n a tawiawm a ni.