Parliamentary Secretary Pu H. Zothangliana chuan vawiin khan Mizoram Hindi Training College Durtlang in an college Fresher’s Social hmasaber an College Auditorium-ah an bautsaih chu khuallian niin a hmanpui.

Parliamentary Secretary Pu H.Zothangliana chuan ram pumah cheng mi tam zawk ten an hman Hindi tawng, pawimawhna hi ka hre tawh a, tunah chuan Hindi tawng thiam tul tiin Hindi zirna lamah tan kan la nasa a ni, a ti a. Hun kalta khan Hindi tawng thiam leh a pawimawhnate kan man pha lova, kan zir duh lova mahse tunah chuan Hindi thiam loh chu hmasawnna daltu lian tak nia ngaiin a pawimawhna leh Hindi tawng thiam hian awlsamna tam tak min siamsak thei a ni tih kan hre thar a tiin Mizoram Hindi Training College chu Sawrkar chuan a ngaihven reng thu a sawi.

Parliamentary Secretary chuan zirna sang zawk chawikan leh thuamthatna atan tunhnai khan State Higher Education Council din anih thusawiin hemi hnuaiah hian Rashtriya Ucchathar Shiksha Abhiyaan (RUSA) chu kalpui tum a ni, a ti. RUSA Project Approval Board chuan Mizorama zirna in sang zawkte(College leh University) tihhmasawnna turin State Higher Education Plan cheng vaibelchhe 63 hu DPR buatsaih mek thu a sawi bawk.

College zirlaite chu dan leh hrai ngaipawimawh a zah nachang hre tur leh dan leh thupek zawm kawnga mi dangte tihhmuhtu, hmahruaitu leh zir tir thin turin a chah a, an kal zelna turah duhsakna a hlan a ni.

Fresher’s Social programme hi Higher & Technical Education Director Dr. L.N Tluangi pawhin a hmanpuiin thu a sawi a, Mizoram Hindi Training College Principal Dr. H. Dengkimi chuan college chanchin tlangpui a sawi bawk.

Mizoram Hindi Training College hi kum 1975 khan din tan niin Mizoram a Hindi zirtirtute intuaihriamna hmun pawimawh tak a nih bakah Hindi Shikshak Diploma, Hindi Shikshan Praveen leh Hindi Shikshan Parangat(Hindi B.Ed.) course te an kalpui a ni.