July 25 a Chief Minister hova High Level Meeting thurel bawhzuiin kum 5 piah lama NLUP kalpuina tur supplementary plan buatsaih dan tur chungchang ah leh NLUP kal meka tan lakna tur pawimawh bikah te department hrang hrang te inbuatsaih na thlir hovin vawiin khan Chief Secretary Pi L.Tochhong hovin C.S conference room ah department pawimawh te an thu khawm a. Supplementary project atan hian department te chu an hmalakna tur lo chhawp chhuak a, ruahmanna fel tak siam tur leh September ni 15 hma a peih fel vek tura tih an ni.

Vawiin meeting ah hian NLUP hlawhtlinna tura tan lakna tur pawimawh zual te sawi ho a ni a. He project kal lai chhawm nung turin kawng hrang hranga awareness campaign, training leh inspection te uar zawka kalpui tum a ni a. Department hrang hrang te chu an beneficiary te hnathawh endik a, an hmalakna huam chin leh hlawhtlinna neih tawh dan te mumal taka chhui chhuak tura tih an ni a. Hma lakna tur pawimawh zingah beneficiary te training pek dan tur te, beneficiary titha te sorkar scheme dang atanga chhawmdawl zuina tur kawng dapsak te, beneficiary rinawm lo te check na tur leh enkawl zui tlak lohte chungchang kalpui dan tur te, power supply leh link road a farmers te harsatna sutkianna tur te, Forest leh Revenue department te hmalakna tur leh he project hlawhtlinna tura thil pawimawh dang te sawi ho a ni bawk.

Chief Secretary chuan NLUP hlawhtlinna turin he project hnuaia hmalakna hrang hrang ah line department te chu “convergence” thupuia nei turin a chah a. Industries department hnuaia petty trade chi hrang tam lutuk chu ennawn a, siam that tul a ti a. Vawiina thurel tur zinga tel, Fishery leh Regulated market chungchang ah a hranpa a meeting neih turin a ti bawk.