Vawiin khan Food Civil Supplies & Consumer Affairs Minister Pu John Rotluangliana hovin a pisa-ah kumin October thla atanga Lumding -Badarpur-Silchar inkara rel kawng zauh hna tan tur avanga Mega road block awm tur leh hemi chhunga chakkhai lakluhna tur kawng dang zawn chungchang sawihona hun hman a ni a. He hunah hian Parliamentary Secretary Pu T.T. Zothansanga pawh a tel a ni.

Minister chuan kawng dan anih dawn avang hian Mizo mipuite tana harsatna awmlo thei ang bera buhfai chawkluh dan kawng ngaihtuah a tul thu sawiin, chak taka hmala turin kalkhawmte chu a hrilh a. State thenawm Tripura-in Vishakhapatnam atangin Bangladesh kaltlanga buhfai an lak tan tawh thu leh, hemi kawng hi Mizoram tan hman ve theih a ni dawn em tih te leh rawtna dang hrang hrangte meeting-ah hian ngaihtuah ho a ni. Road block avang hian Mizoram leh a thenawm state hotute chuan harsatna an tawh loh nan Sorkar laipui hnenah hma la turin thu an lo thlen tawh bawk a ni.

Vawiin meeting-ah hian PWD Principal Secretary Pu Lalram Thanga leh FCS&CA Secretary leh Director ni bawk Pu R. Lalvena bakah PWD leh FCS&CA-a officer pawimawh te leh FCI aiawhin an Area Manager a tel a ni.