Pu J.H.Rothuama, Minister, Co-operation etc. in Kawnpui Consumers’ Co-op Society Ltd. ten National Excellence Award 2008 an dawn lawmna a hmanpui.
Khuallian Pu J.H.Rothuama chuan lawmpuina thu sawiin hetianga titha leh National Excellence Award dawng thei an ni chu Kawnpui Society hotute chungah lawmthu a sawi a, thahnem ngai taka bei fan fan turin leh tang zel turin a fuih a. Upa Senior zawkte aiin thalai lamte hian uar turin a fuih bawk a ni. Khuallian chuan Development atana pawimawh ber chu Co-operative Society tha hi a ni a. Chung chu khaw chhak lam ram changkang Japan, China leh Thailand te leh khawthlang lam ram changkanna siamtu chu Co-operative Department hi a ni thin a. Tunhma in kan ramah hian Co-operative Society  hi a lo awm tawh a. Amaherawhchu ngaihtuahna puitling in kan la ngaihtuah ngai lova. Heng India  ram state pawimawh zawng zawng State lian ah te hian Co-operative Society te hi a chang tur chuan Minister thil tithei nih a ngai a. Mizoram chuan Co-operative Society chu lian mahse a hnathawh theih chi te a tlem a, mipuiin a tangkaina tak tak kan hre phak lo a ni. Dawrkai te tak te khawilai emaw a in ngah chhawk a khatiang ang lek te a kan ngai te kha a dik lova. Hei Kawnpuiin thahnem ngai taka in lo din chhoh hi a ropui a. Kum khat ah nuai 1 kan hlep ti mai lovin nuai 40/50 atanga Vaibelchhia thleng hlep ve thei turin kan rilru kan tinzawn hi a ngai tawh a ni. Mipuite rinawmna leh taimakna a thara kan in zirtir a ngai a ni a ti bawk.

Minister hian Kawnpui Co-operative Society Ltd. hnenah hian lawmpuina certificate leh pawisa fai Rs. 5000/- a hlan a ni.

Kawnpui Consumers’ Co-op Society Ltd. hi kum 1968 a din tan niin Member 142 an awm a. Hardware leh Stationery hmanga sumdawn a ni. Silchar atanga bungrua lain mipui hnenah a tlawm thei ang bera an lei theih nan hlep 10% neiin hralh a ni. A pawimawhna ber pakhat chu Price Control a ni a. Kolasib District chhungah chuan Kawnpui hi thil man tlawmna ber a ni. Hei vang hian Kawnpui chauh nilo, Hortoki, Zanlawn, Khamrang,  Serkhan, Bualpui, Thingdawl lamah bungrua an hralh nasa hle a ni.

Kawnpui Co-operative Society ina an lawm National Co-operative Excellence Award hi January ni 15, 2009 khan New Delhi-a NCUI Auditorium ah Union Minister Pu Sharad Pawar in a hlan a. He award hian Citation bakah pawisa fai Rs. 50,000/- a keng tel a ni. Mizoram ah chuan Kawnpui Consumers’ Society chiah hi a dawng awm chhun an ni.

Minister hi bialtu MLA Pu Hmingdailova Khiangte, Pu HP Sahu, IAS, Registrar, Co-operative Society te leh official tam takin an tawiawm a ni.