Vawiin tlai hian Pu J. Hmingthanmawia, Lawngtlai Bawrhsap chuan cheng 2.2 Crore senga sak Lawngtlai Civil Hospital OPD Building thar a tlawh a, insuan luh a nih theih nana building thar chhehvel singsak dan turte a en.

Lawngtlai Civil Hospital OPD hi Backward Region Grant Fund (BRGF) atanga sum hmuh hmanga sak niin PWD Building, Lawngtlai Sub-Division in an enkawla, Contractor chu Pu Ramthanmawia a ni. Tunah hian sak zawh tawh niin thla tawp lam hian inhlan fel hman tum a ni. Amaherawh chu OPD Building thar tur tual velte, tui connection leh tui dahkhawlna tur te, a sira lungrem te, a hungna turte leh Laboratory Building nena inkalpawhna tur Step te bakah Waiting Shed-te siam a la ngaih avangin luahluh nghal mai theih a ni dawn lova, chuvang chuan Bawrhsap hian District hmasawnna tur sum awm ang ang te hmanga heng mamawh zualpuite hi siam nghal dan ngaihtuah a nih tur thu sawiin hna pawh tan nghal a nih tur thu a sawi a ni.

Sawrkarin Lawngtlai District Civil Hospital hi nasa taka thuam that a tum mek a, tunah hian Hospital Building sakna tur sum pawh ruahman fel tawh niin sak thuai tuma ruahmanna siam mek a ni.

OPD Building thar a tlawh hnu hian Lawngtlai Circuit House, Backward Region Grant Fund (BRGF) sum Rs 50 lakh senga chei thar mek pawh a tlawh a, Circuit House chei thar pawh hi zawh fel dawn hnaih tawh niin reiloteah hman chhunzawm leh mai theih a nih tawh tur thu thawktuten an lo hrilh a ni.

Pu J. Hmingthanmawia hi Chief Medical Officer Dr. Hc Thangkima, LADC CEM Charge la mek tu Pu Chhuanmawma, EM te, CYLA President Pu Vanlianhrin leh LWA President Pi Vanlalhruaii ten an tawiawm a, Medical Superintendent Charge la mektu Dr. C. Vanlalduhsaka leh DIO, Dr. Zothanpari Chhakchhuak ten an lo dawngsawng a ni.