Pu J.H Rothuama, Chairman NLUP Implementing Board chuan vawiin Dt 30th January 2014 hian Mamit District-a NLUP Line Department hotute Tourist Lodge, Mamit-ah meeting a neihpui.

He meeting-ah hian Pu J.H Rothuama Chairman NLUP Implementing Board chuan NLUP hmanga mi harsa zawkte khaichhuahna tura Sawrkar Flagship Programme hi a hlawhtlin ngei theih nan a hmun ngeia a kal a hriatpui a tul a, hmalak tawhnaah Line Department hrang hrangte chungah lawm thu a sawi rualin nasa leh zuala tan lak a tul a ni a ti a, tanpuina dawng tawh si a hmala duh lo te chu huaisen taka cut ngam turin Line Department hotute a chah bawk.

NLUP Implementing Board Chairman chuan cheng vaibelchhe 370 chuang sengin hmalak chho leh anih dawn thu sawiin a endikna (Monitoring) lamah chak taka kan kal a tul thu sawiin Mamit District hi Potential Area anih vangin NLUP hmanga eizawnna kawngah pawh a hlawhtling ber District kan ni thei a, chuvangin chuan thawktute pawh kan inthlahdah loh a pawimawh dawn a ni a ti.

NLUP a sangha khawitute tan sangha vawn that theihna Cold Storage pawh Mamit District-a hmun remchang berah dah turin ruahman a nih tur thu a sawi bawk.

He meeting-ah hian Pu Zorammuana Member Secretary, NLUP Implementing Board pawhin sawrkarin NLUP kalphung thar tur a duante sawifiahna a nei bawk.

Line Department hrang hrang hotute’n an hmalakna Reports he meeting-ah hian an pe bawk.

Pu J.H Rothuama Chairman NLUP Implementing Board chuan Mamit-a Vety Department kaltlanga NLUP thlangtu hlawhtling Pu Zatluanga Sailo leh Pi Vanlalnghaki te vawk vulhna hmun leh Industry hnuaia Carpentry thlangtu Pu P.C Pachhunga te hnathawhna a hmunah kalin a tlawh.

Pi Vanlalnghaki Zion Veng, Mamit hian vawkvulh thlangin tunah hian pui 6 neiin vaiin 14 a enkawl mek a, Pu Zatluanga Sailo, Zion Veng hian vawk 8 neiin vawkpui rai lai 3 leh rai lo 3 a vulh mek bawk a ni.

Tin, Pu P.C Pachhunga Charkawn Carpentry thlangtu te hian thlatin cheng singriat dawn lai an thawk chhuak thin bawk a ni.

Pu J.H Rothuama hian vawiin vek hian Zawlnuam pannin NLUP hmanga hmalakna hrang hrangte a hmunah a tlawh anga, Rubber phunna hmun turte a hmunah a enfiah nghal dawn a ni.

Pu J.H Rothuama, Chairman NLUP Implementing Board hi Pu Zorammuana Secretary NLUP Implementing Board, Pu David Thangliana Chief Media Officer, NIB leh Line Department hotuten an tawiawm a ni.

Attachment

  • Loading attachment...