Nimin chawhma dar 11:00Am khan Lawngtlai District Election Officer Pu. J. Hmingthanmawia chuan Lawngtlai District chhunga Electoral Roll Final Revision 2014 chu a tlangzarh.

Nikum lama Final Roll chu Draft Roll a hmangin kumin January 1-10 chhung khan District chhunga khua zawng zawngah ennawnna kalpui lehin thun thar ngai leh paih ngaite (revision) neihpui leh vek a ni a. Chumi hnua he Final Roll 2014 hi buatsaih a ni.

Final Roll a a lan danin Lawngtlai District chhungah vote thlak thei mipui 72076 awmin heng zinga mi 36343 hi hmeichhia an ni a, Mipa 35733 awmin mipa aia hmeichhia an tam zawkna zat hi 610 a ni. Nikum 2013 Roll aia kumin a vote thlak thei an punna hi 1550 a ni thung a, a pumpuiah 2.19% a pung ang a ni.

Assembly bial pathumte punna leh Final Roll a an dinhmun chu a hnuai a mi ang hi a ni.

Lawngtlai District chhunga mipui awm zawng zawng atanga vote thlak thei awmzat percent hi 54% a ni a, hetihlai hian national level chu 61% a ni thunga, Election Commission beisei ang chuan national level aia 5% a hniam emaw, a sang zawk emaw (5% Variation) chin hi pawm theih niin a baka danglam chu duhthusam zo lo anga ngaih a nih avangin Lawngtlai District chhungah pawh nasa zawka hmalak zel a la ngaih thu District Election Officer hian a tar lang a, hetih laiin District chhung a mi hmun danga lehkha zirte,hnathawkte, Roll a inthun ngaihsak tawklo tam tak an la awm vang te leh pem kual an tam avanga chak taka hmalak a harsat thu a tarlang tel bawk.

Roll a inthun thar tur hian engtiklai pawhin Election Branch leh hetiang lam buaipui tute chu an dawr  theih reng a ni a, Roll a chuang thei tawh la chuang silote chuan ngaihven thuai nise a duhawm hle ang a ti bawk .

Electoral Roll thar ber hi Political Party tinte pek an nih bakah District Election Office leh ARO leh AERO te kutah en theih in a awm renga, a duh a piang tan en theih a ni.