NLUP infrastructure development sum hmanga MULCO complex, Thuampuia sak mek, Indigenuous Milk Processing Plant chu vawiin khan NLUP Implementing Board Chairman Pu J.H.Rothuama’n a tlawh a. MULCO hotute nen he Milk Processing Plant tih puitlinna tura hmabak la awmte an thlir ho.

MULCO complex-a Dairy Plant thar buatsaih mek hi nikum June 24, 2013 khan Chief Minister Pu Lal thanhawla’n a lungphum a phum a. Tunah hian a building sak hna hi chak taka thawh mek niin kumin May thla tawpah zawh hman beisei a ni a. He Dairy Plant hi peihfel a nih hun chuan nitin bawnghnute 5,000 litres a sawngbawl thei dawn a. Hei hian bawnghnute atanga eitur siam chhuah a tipung dawn chauh ni lovin, MULCO in nitina bawngvulhtute hnena atanga a bawnghnute lak theih zat pawh nasa takin a tipung dawn a ni. Tunah hian MULCO in nitina bawnghnute a hralh chhuah hi a tlangpuiin 7747 litres vel a ni a. MULCO hnuaiah hian society 34 awmin member 528 an awm mek a. Bawnghnutea eizawnna tilian deuh deuh turin Aizawl district bakah Mamit leh Serchhip district a bawngvulhtute thar chhuah pawh laksak turin MULCO chuan ruahmanna an kalpui mek a ni.

Bawnghnutea eizawnna ti hmasawn tur leh bawngvulhtute dinhmun chawikan nan NLUP atangin kawng hrang hranga hma lak a ni a. Tun kum 3 chhung hian NLUP sum hmangin MULCO chu nasa taka thuam that a ni Vawiina NIB Chairman in MULCO complex a tlawh hian MULCO hotute, Dr. Lalhmingthanga, Manging Director, Pu Vanlalchhunga, Chairman leh MULCO hotu dang ten lo dawngsawngin helai complex tih changtlunna tura hmalakna tur hrang hrangte leh ruahmanna awm mekte an sawi ho a ni.