Vawiin khan HPC Vice-Chairman Pu S.Laldingliana chuan Lunglei chhuahlam rama awm Lunglei hmingput chhan ‘Sipai Lui (Lunglei)’ tlawhin helai hmun cheibawl dan tur a enfiah. 

HPC Vice-Chairman Pu S.Laldingliana chuan Lunglei hming putchhan hi ngaihthah mai theih a nilo a, tuna khuarel awmsa te tichhe lo thei ang berin awmze nei zawka cheibawl tum a ni a, helai hmun cheibawlna atan hian HPC sum hmanga hnathawh a ni ang, a ti.  ‘Lunglei’ hmunah hian chawlhhahdamna tur mawi leh tha tak, chhungkua leh thianho tan pawha hman tangkai theih tura siam a nih tur thu leh khualzinte leh a tlawhtu apiangte tana entlak leh kal chakawm turin buatsaih a ni ang, a ti. ‘Sipai Lui (Lunglei)’ hmun panna kawng pawh siamthat dan tur PWD Engineer-te nen enho thuai a tum thu a sawi bawk. 

HPC Vice Chairman hi Lunglei West bialtu MLA Pu Chalrosanga Ralte bakah chanchinbumi thenkhat ten an tawiawm a ni.