590/2022-2023
Kolasib dated 23rd May 2022: Vawiin chawhnu khan Deputy Commissioner, Kolasib pisaah Pu John LT Sanga, DC chu President, District Scouts & Guides Association, Kolasib atan lakluh a ni a. Scouts rinawm ni tur a intiamna hun hmangin Pu Lalrambuatsaiha, District Commissioner (Rover) in he hun hi a kaihruai a ni.

Pu John LT Sanga, Deputy Commissioner, Kolasib chuan Bharat Scouts & Guide inkaihhruaina leh thil tum hrang hrangte chu ropui a tih thu leh chutiang ang pawl kaihruai tur a President nihna an hlan chu lawmawm a tih thu a sawi a. Midangte tan a luangchhuak tur a pawl din a nih angin midangte tanpui thei turin Scouts leh Guide theuhte pawh taksa leh rilru hriselna lam ah mahni invawng a inthunun theih a pawimawh thu a sawi. Deputy Commissioner chuan Scouts & Guides nihna chuan mawhphurna pawimawh tak tak a ken tel thu sawiin mi te tan faina kawng ahte, nungcha leh leilung hausakna humhalh kawng ahte leh nunphung zahawm zawh kawng ahte entawn tlak nih tum zel turin kalkhawmte a chah bawk a ni.

Hun kaihruaitu Pu Lalrambuatsaiha, District Commissioner (Rover) chuan Kolasib district-a Scouts & Guide inrelbawlna kalpui dan tarlanna hun hmangin School Education Department leh Sports & Youth Services-a thawktuten hemi pawl hnuai ah hian hma an lak ho thin thu a sawi a. Mizorama Scouts & Guides din tan a nih dan te sawiin June ni 6, 1932 khan Lunglei Scout Troop din turin, Lunglei Serkawn ah Court of Honour siam a nih thu leh Mizoram Scout Troop hmasa ber din nghal a nih thu a sawi.

Attachment

  • Loading attachment...