Pu John Rotluangliana, Minister FCS&CA, Tranport, Tourism/Bialtu MLA chuan Ni 7-12 May, 2018 chhung khan a bial chhung khaw hrang hrang Mamit, Phaizau, Suarhliap, Damdiai, Vawngawnzo, Sabual leh Bawngva khuate a tlawh.

Bialtu MLA hi khaw hrang hrang khawtlang hruaitu leh mipuite'n ropui taka lo hmuakin,  amah lo lawmtu mipuite leh khawtlang hruaitute hmaah thu sawiin damlohna a tawh chungchangah bang lova an lo tawngtaipuinaah lawmthu a sawi a, Bial mipuite tawngtaina Pathianin a chhan avanga anmahni tlawh leh thei a nih thu leh hriselna petu Pathian hnenah lawmthu a sawi a ni. Bial chhung khaw hrang hranga amah lo lawmtu mipuite pawhin an tana rorel tura Pathianin a pek anih avanga natna khirh tak a tuar chunga damna a chang chu an lawmpui thu Bialtu MLA hi an lo hrilh a ni.

Pu John Rotluangliana, Bialtu MLA hian khawtlang mamawh hrang hrang khawtlang hruaitute'n an lo thlen chu a theih ang anga tihhlawhtlin sak nghal an ni a, tun maia tihhlawhtlin lohah pawh hmalaksak zel a tum thu a sawi a ni. Bial chhunga Matric Pass thar zawng zawngte a lawmpui thu sawiin an kal lehzelna turah duhsakna a hlan nghal bawk a ni.

Pu John-a chuan Mizoram Sawrkarin mipuite hmasawnna tur leh mi harsa zawkte'n lei rem an rahna tura NLUP hmanga tanpuina chu a aia tha a awm chuan loh avangin kalpui chhunzawm zel a ni dawn a ni a ti. Mi harsa zawkte'n in leh lo an dinna tura Chief Minister hmalakna a CM Rural Housing Scheme chu kalpui chhunzawm zel tum a ni a. Sawrkarin mipuite hriselna chu a ngaihpawimawh ber a nih avangin Referral Hospital chu Medical Council of India-in an approved tawh avangin kumin August thla atangin Doctor zir theihna tura hawn tum a ni a, hei hian zoram chhunga doctor indaih loh vanga kan buaina chinfel thuai a beisei thu a sawi. Ei leh bara mipuite hnianghnar zawka kan awm zel theihna turin hma chak taka lak zel a ni a, rel kawng Sairanga lo chhuak tur sial hna pawh ngawrh taka kalpui mek zel niin kum 2019 April thlaah chuan peihfel hman beisei a ni a ti bawk. Hei bakah hian furpui lo thleng tura mipuite'n buhfaia harsatna kan neih lohna turin a theih ang anga buhfai chhekkhawl a ni a, mipuite chu chi-ai lo turin a chah a ni.

Bialtu Minister chuan mipuiin roreltu tha in duh ang bawkin keini pawn mipui tha, mipui rinawm kan duh ve a, ram kalphung siam turin mahni theihna zawn theuhah ngaihtuahna senga ram leh khawtlang tana lungrual taka thawk tlang dial dial turin bial mipuite a sawm nawn leh a ni.

Bialtu MLA hian vawiin khan Mamit District Hospital-a damlote a tlawh a, Hospital-in harsatna an neihte leh chinfel dan turte thawktute sawipuiin Hospital Choka sak thatna turin MLA Fund atangin Rs 50, 000/- a pe a, Dr C. Malsawmkima DM Super Specialist zirtura General Quata a tling lawmpui nan Rs 5000/- a hlan nghal bawk a ni.

Pu John Rotluangliana hi Mamit khawpui chhunga Officials-te leh khawtlang hruaitu mi thahnem takin an tawiawm a ni.

Pu John Rotluangliana, Bialtu MLA hian naktuk hian Dampui tlawhin Aizawl a pan nghal ang.