Vawiin khan Zemabawk YMA Hall ah Sentea Memorial School, Zemabawk chuan Graduation Day an hmanga, High School Leaving Certificate Examination 2018 result a za a 92 pass percentage an neih lawmna leh an school atanga Mizoram a HSLC top ten zinga in ziak tling chawimawina hun an hmang nghal bawk. He program ah hian Deputy Speaker Pu Lalrinawma chu Khuallian niin AH&Vety Commissioner & Secretary Pu Lalthangpuia Sailo, IAS, P&E Commissioner & Secretary Pu H.Lalengmawia, IAS te bakah khawtlang hruaitute leh zirlai nu leh paten he hun hi an hmanpui.

Deputy Speaker Pu Lalrinawma chuan Sentea Memorial school in HSLC result tha tak an nei chu lawmawm a tih thu a sawi a, zirlaite chu zirna a Mark sang hmu satliah lovin midang tan, khawtlang tan leh ram tana mi tangkai ni turin a chah a, mi hlawhtling ni tur chuan chhuanlam siam bansan angai, a ti. Pu Lalrinawma chuan Zirtirtu, zirlaibu leh school te aia pawimawh chu Zirlaite hi in ni, a ti a, Zirna leh Thiamna hmangin Ram leh hnam humhalh a ngai a ni, a ti bawk. Thalaite chu Social Media hman chin tawk hre turin a chah a, Social media kan hmanna kawngah pawh Mizo tawng dik tak hmanga kan hnam tawng chawi nung zel turin a hrilh a, School a hman turin Green Board sawm a hlan nghal bawk.

Pu Lalengmawia IAS chuan, Sentea Memorial School zirlaite bakah zirtirtute leh zirlai nu leh pate thawh rimna avanga result tha an nei chu lawmawm a tih thu a sawi a, Zirlaite chu an hma hun atan mahni inrintawkna leh tumruhna vawng tlat turin a chah a, harsatnate chu a eng zawnga thlir thiam turin leh huai taka hmachhawn zel turin a fuih bawk.

He programme a hman zawh hian Deputy Speaker Pu Lalrinawma hian Government Sihphir High School HSLC Result lawmna a hmanpui bawk.