Pu John Rotluangliana, Deputy Speaker, Bialtu MLA ni bawk chuan nimin khan Nalzawl panna kawng Hawrhpup Lei a hawng.

Thusawiin Deputy Speaker chuan Nalzawl khua-in hun kal tawh a kalkawnga harsatna an lo tawhna Hawrhpup Luia Motor kal theiha Leilawn siam a lo ni ta chu thil chhinchhiah tlak a nih thu sawiin Nalzawl mipuite a lawmpui thu a sawi a. He lei hi a chhawrtu tur ber chu Nalzawl mipuite an nih avangin duat taka enkawl turin a chah bawk a ni.

Pu Ramtinchawma, Bawk Chairman pawhin khawtlang aiawhin lawmthu a sawi bawk.

He lei hi Semi- Permanent Bridge niin, a dung 82 ft niin avang ft 8 a ni a; a ban leh beam hi RCC niin a chhuat phah thingphel a ni. He lei hi MGNREGS leh IWDP sum hmanga siam niin Rs 7,50,000/- senga dawh a ni.

Pu John Rotluangliana, Deputy Speaker Bialtu MLA ni bawk chuan nimin vek khan Bawngva khuaa Bharat Nirman Rajiv Gandhi Sewa Kendra (BNRGSK) Building a hawng.

Hawnna inkhawm  Pu Gabriela, Vice President, V/C kaihhruaiah thu sawiin Khuallian chuan hmasawnna reng reng hi inlungrualna leh thawhhona tha atang chauhva neih theih a nih thu sawiin khawtlang hruaitute thawhhona tha nei turin a chah a, tuna BNRGSK Building hawn pawh hi vantlang ta ti a en mai lovin neitu thinlung pu a  enkawl a tul dawn a ni a ti a. A hmanna tur dik taka hman a nih theihna turin duhsakna a hlan bawk.

Khuallian chuan Bru Repatriation chungchang sawiin ruahmanna kalpui mek a ni a ti a; remchang hmasa berah laklet hna kalpui a ni ang a ti. Ralmuanna hnuaiah Zoram hmasawnna kalpui a nih mek lai hian Bru an ni emaw, Chakma an ni emaw Mizo an ni emaw eng mi pawh misual te chu sorkarin a dim dawn lo a ni tiin hetianga harsatna siamtute chu tu pawhin kan dem ngam tur a ni a ti. Mipuite chu thlamuang tak leh inlungrual taka awm turin a ngen a ni.Bialtu MLA hian Bawngva mipui te tan Television Set a pe bawk a ni.

He hunah hian Pu C. Lalpeksanga Project Diretor DRDA, Mamit pawhin thu a sawi bawk  He BNRGSK Building hi Category B niin Rs 7.87lakh seng a sak a ni.

Deputy Speaker hi Mamit atangin Head of Offices te leh khawtlang hruaituten an tawiawm a ni.