Vawiin ni 6. 2. 2013 chawhma dar 11:00 khan Mamit Chhim Veng YMA Hall-ah State Bank of India, hnuaia hmalakna peng pakhat Corporate Social Responsibility : Direct Activity Scheme leh SSA Mision, School Education Department, Mamit District tangkawpin Mamit District chhunga Primary, Middle leh High School thlan bik School 100 (za) te hnena Tui tihthianghlimna (Water Purifier) 172 zet sem a ni, He hun hi Pu John Rotluangluana, Deputy Speaker chuan khuallian niin a hmanpui.

Water Purifier semna inkhawmah hian Khuallian Pu John Rotluangliana, Deputy Speaker chuan thu sawiin State Bank of India in hriselna lam hawi a ke an pen leh naupang hriselna ngai pawimawh a tui thianghlim in tur naupangten an neih theih nana an hnathawh chu a fakawm in, zirlai te tan hetiang pek nachang an hria hi an remhre hle a ni a ti a. Water Purifier chu a zirlai naupang ten an chhawr tangkai ngei theih turin a naupangte ban phaka dah ngei turin a dawngtu school te chu a chah a. Zirtirtu ten zirna lamah theihtawpin an thawk a, SBI ten hriselna ngai pawimawh in zirlaite tan tui thianghlim min chhawp sak a, hmalakna a kal rual tlang a a lawmawm hle a ni a ti a. He huna lo kal khawm zirtirtute pawh fuihin Zirtirtu te hi hnam insiamna tobul in ni a, World Class Education kan neih theihna tura tan la thar lehzual turin Zirtirtute in pawimawh hle a ni a ti.

Khualzahawm Pu V. Lalremthanga, IAS, Mamit District Bawrhsap pawhin thu sawiin SBI hnathawktute inpekna leh remhriatna te, an thawh rimna te leh mipuite tana an rawngbawlna te chu an fakawm hle a ni a ti.Tui thianghlim hi naupang hrisel nan a pawimawh a, tuna naupangte hriselna atana an thawh hi hun lo kal leh tur a ram hrisel kan lo nih theih nan a pawimawh hle ni a ti.

Pi Lalawithangi, Manager, SBI Mamit pawhin inlawmna leh khuh hawnna thu sawiin SBI hmalakna hrang hrang te a tarlang a, SBI hian kum tin an hlep 1% hi mipui tana tangkai tur atan an hmang thin a, tun kum kal mek 2012-13 ah hian hriselna lam hawia hmalak a niin, India ram hmun dangah pawh hmalak niin, Mizoram bikah chuan Civil Hospital, Saiha ah Ambulance pek a ni a, TNT Aizawl ah Truck pek a ni a, Special Gilead School tan Bus pek a ni bawk a, CYMA tan Ambulance pek tura ruahman mek a ni bawk a ni a ti.

Water Purifier semna hun leh lawmthu sawina hun Pu Micky Lalenkawla, SDEO, Mamit & West Phaileng in a rawn hmang a. Mamit a Department Officer engemaw zat in he hun hi an hmanpui bawk a ni.

Pu John Rotluangliana, Deputy Speaker hian MLA Fund atangin Chhim VengYMA Hall a Sound system repair na tur Rs. 50,000/- leh Pi Thanmawii Bazar veng Mamit a hmeithai in sak nan Rs. 30,000/- a pe a ni.

Tukin zing kar khan Deputy Speaker hian Hmar Veng, Community Hall sak mek leh Chhim Veng Field Veng bul a Bazar building te enin a chhunzawm dan tur te Engineer te leh khawtlang hruaitute nen enho in ruahmanna te an siam ho a bawk a.

Deputy Speaker, Pu John Rotluangliana hian nimin ni 5.2.2013 khan Mamit a zirna hmun pawimawh tak tak Polytechnic leh JNV School building sak mek leh hmunhma te a hmun ah enin a tlawh a. Dy. Speaker chuan heng building te hi Mamit District tana asset pawimawh tak anih avangin thawktuten thahnem ngai taka in thawh a tul a ni a ti a. Anni pawhin an harsatna neih mek te hi Dy. Speaker a hnenah hian an lo thlen bawk a ni.