Vawiin khan Pu John Rotluangliana, Minister FCS&CA, Transport, Tourism, Bialtu MLA chuan Mamit District mipuite'n tangkai taka an hman atan Inspector of Legal  Metrology (Working Standard Laboratory) Office, thar Mamit Hmarveng a mi chu a hawng.

Office thar hawnna inkhawmah Pu John Rotluangliana chuan vawiin hi Mamit District tana ni chhinchhiah tlak leh mellung pawimawh tak a ni a ti. Legal Metrology Department chu mipuite hmelhriat hlawh vak an ni thin lova, amaherawhchu an hnathawh ber hi mipuite'n kan dikna chanvo kan chan a, mipuite chhantu a ni dawn a ni a ti. Tunah chuan sumdawngte atanga mipuite'n kan thil lei, a man chungchangah emaw, a chhiat a that thu-ah District mipuite tan a tangkai hle dawn a ni a ti. Kan nitin mamawh Petrol, Diesel bakah Ration buhfai buk tlinglo leh kan lakah emaw kan chanvo dik tak kan channa turin Mamit District mipuite tlawmngai pawl leh khawtlang hruaitute thawhpuia sawmin tangkai taka hmang turin duhsakna a hlan a ni.

Bialtu Minister chuan Mizote hi phunchiar ve thin tak mai kan ni a, Gas buk tlinglo laka kan fihlim theih nan  buk zawha lak zel tura hmalak a ni a, nghak peih leh chuang lova buk lo a, lak mai duh tam tak kan awm leh tho a ni a ti. Legal Metrology Department chu Mizoram tan an pawimawh em avangin tih lena Directorate hrana dah turin Sawrkar chuan ruahmanna a kalpui a ni a ti bawk.

Bialtu Minister Pu John Rotluangliana chuan Mamit District chhunga hmasawnna hnathawh hrang hrangte a tarlang a, hmasawnna hna chu khawpui a awmte tan chauh niloin thingtlang kilkhawr zawkte thleng pha turin kawng sial leh siamthatna tur hna kalpui chhoh mek a ni a, kan District chhungah pawh nuai tam tak sengin Belkhai to Rajiv Nagar te, Andermanik panna kawngte siam tura hmalak a ni a ti bawk, Mamit khawpui chhunga hmasawnna  hrang hrangte pawh mipuite chu a hmutu leh hrechiangtu kan ni a, Sawrkar Department  hrang hrang sak that leh hawn belh tam tak a awm a ni a ti.

Heng hmasawnnain mimal tinte min thlen rual hian Social media kan hmandanah erawh inenfiah kan ngai hle a, tawngkam chhe tak tak hmanga inbeih nan mai maia kan hmang a nih chuan kan ram leh hnam min tichhetu-ah kan hman mai a hlauhthawn thu a sawi bawk.

Pu Vanlalrema Hnamte, Asst Controller chuan report pein Mamit District tana Working Standing Laboratory(Legal Metrology) hawn tak sak hna hi Ni 6th April, 2016 ah sak tan a ni a, Ni 21st Nov, 2016 khan zawhfel a ni. A len zawng hi a dung 42ft leh a vang 28ft a ni a, a chhuat hi floor tile phah vek a ni. A sak hna hi Mizoram Technocrats Company te'n an thawk a ni. Tunah hian thawktu Inspector hoin mi 3 an awm mek a ni.

Working Standard Laboratory (Legal Metrology) hawnna hun hi Pu Laldawngliana, Jt  Controller chuan a kaihruai a, Pu Johny Remngaia, Deputy Controller-in lawmthu sawina a nei a ni.

Mamit khawpui chhunga sawrkar Department hrang hrang atang te, Khawtlang hruaitu leh tlawmngai pawl aiawhte an tel a ni.

Vawiin vek khan Bialtu MLA Pu John Rotluangliana hian PMGSY hnuaia cheng 1033.52 senga kawng sial hna thawh mek  Mamit to Phaizau Road 10.48 Km chu a hmunah a tlawh a, kawng sial hna thawktute chu inremna awmsa anga October thlaah chuan hna zo ngei tura tan la tur leh a hna viltu PWD-te pawh hna chak zawka a kal theih nana a enzui leh bawhzui ngaiahte tha thlah lova tan la turin a chah bawk a ni.

Pu John-a hian Phaizau khawtlangte vantlang inkhawm a neihpuiah thusawiin khaw mipuite chu an khaw tana hmasawnna thlen tura pawimawh hmasa ber chu kawngtha taka a tlang hi a ni a, chumi hnuah chuan hmasawnna hrang hrang kan hriat phak bak bak thlengin min la rawn thleng dawn a ni a ti. Phaizau  khaw mipuite chu Sawrkarin hmasawnna hna an khaw tana a thawh ropui takte chu hmuh hmaih lova khawtlang  leh ram tana thawk tlang zel turin a sawm a ni.

Bialtu MLA Pu John Rotluangliana hi Mamit atangin Officials-te bakah khawtlang hruaitute'n an tawiawm a ni.