Vawiin chawhnu khan Finance Minister Pu Lalsawta leh PWD Minister Pu Lal Thanzara te chuan Tuithiang  leh Saron veng in ramri na lai a lei tawlh an tlawh.  Hna thawh tan a nih mai lohna chhan te an mahni lo tawiawmtu  Finance, PWD le DM&R official te chu zawt chiang in hna thawh nghal a nih theih nan ruahmanna an siam pui nghal a. Hnathawh na atan hian New Economic Development Policy(NEDP)  hnuaia State Disaster  Mitigation Fund chu hman a ni dawn a ni. 

Vawiina  Finance Minister Pu Lalsawta leh PWD Minister Pu Lal Thanzara te kaihruaina hnuaia inrawnkhawmnaah hian lei tawlh thenfai leh a hmunhma sawhngheh hna chu naktuk,May 10 atangin thawh tan a ni dawn a ni.  Leivung, bungraw chhia, insakna chak la inphum  leh hnawmhnawk thenfai a nih chhung hian PWD hnathawkte chuan kawng dan chah a tul tur thu an sawi a. Chhunlamah lei laih hna thawh a ni anga; zan lamah leivung paih hna thawh a ni thung ang.

Leimin thenfai, lei tawlhna hmun siam rem leh thawm nghet hna - Detailed Project Report(DPR) of 'Restoration of Landslide Area at Tuithiang and Saron Veng Border"  chu  Public Works Department(PWD)  in siam in Disaster Management & Rehabilitation Department(DM&R) hnenah an theh lut tawh a.  Hnathawh turah hian bungraw chhia thenfai  leh senghawi a tel avangin State Disaster Mitigation fund atana Nodal Department , DM&R chuan  DPR chu State Executive Committee(SEC) hmaah  an la pharh leh a ngai dawn a ni. 

'Restoration of Landslide Area at Tuithiang and Saron Veng Border' atan hian Rs 108.19 Lakh ruahman a a ni a. He hna hian leivung thenfai, RCC Channel leh Rectangular Side Drain with cover siam hna te a huam tel ang.  Tuithiang leh Saron veng ramri  kawngpui a lei tawlh enfiahnaah hian Finance Secretary Pu Sawihlira,  PWD  Chief Engineer Pu Lalmuankima Henry leh official ten  Finance Minister leh PWD Minister te chu hnathawh dan tur an sawipui a ni. 

Tuithiang leh Saron Veng inkar leitawlh enfiah anih hnu hian Fianance Minister Pu Lalsawta chuan Bethlehem veng chhung Armed veng nena inkal pawhna C.P Road kawng chhe lai chu PWD, Finance leh Official dang te hruaiin a tlawh a, hmalak dan tur a sawipui nghal a ni.

Attachment

  • Loading attachment...