Vawiin khan Pu John Rotluangliana,  Minister Food Civil Supplies & Consumer Affairs, Transport, Tourism, Bialtu MLA chuan Rajiv Nagar ah Rs nuaih 154.48 senga sak Tourist Lodge a hawng.

Hawnna inkhawm Tourist Lodge tualah neihah thusawiin Rajiv Nagar tana mumang ram maia an lo ngaih thin Tourist Lodge Building tha tak mai leh mawi tak,  hawn an ni ta chu  nichhinchhiah tlak tak a nih thu  a sawi a, Rajiv Nagar leh a chhehvel te tana danglamna thlen tura a intiamna chuan rah a chhuah mek zel a ni a ti. Tourist Lodge chu mi tupawh eng hnam tan pawh zalen taka thlen vek theih a ni a, tumah lal bik leh thleng tur bik an awm lo a ni a ti. Amaherawh chu State Sawrkarin rate bituk a neih erawh chawi a ngaih dawn thu a sawi. Rajiv Nagar leh a chhehvel khuate chu neitu thinlung pu-a building chhiat leh that thu-ah uluk taka enkawl turin a  chah a ni.

Bialtu MLA chuan a bial chhung mipuite chu ram leh hnam khawtlang tana thawk tlang zel turin a sawm a, Mizoram Sawrkar chuan  Border Area awmte chu a ngaihsakin hmasawnna hna hrang hrang an thawhte chu hmuh hmaih lo turin a chah bawk a ni.

Vawiin ni 3 Oct 2018-a All Mizoram Maxi Cab Owner Association te'n nawrh an huaihawt chu pawi a tih thu sawiin, an thil phut Maxi Cab Rate tihsan chungchang hi May 22, 2018 -a atanga hman tan chauh a ni a, thla 4/5 chauh kan la hman avangin ennawn leh a ni rih lo a ni a ti. Tin, All Mizoram Permit an tih hi tun atan chuan Mizoram Sawrkarin tul rihah a ngai lova, a chhan chu Maxi Cab te chu line bik neiin an service theuhva,  chumi kara All Mizoram Permit nei bika a, duh duhna hmun an tlan bik hi thil tha berah a ngai lo a ni a ti. Chuvangin Maxi Cab Owner Association te pawh mipui tana an rawngbawlnana service an ni tih in hre renga, tuna an nawrh mekna chu ti tawp turin a ngen bawk a ni. 

Bialtu MLA hian Soil & Water Conservation Department, Mamit District hnuaia NEDP-NLUP Convergence-a Broom trade thlangtu  mi 26 te tan  Rs 50,000/- (singnga) theuh an dawnna tur lehkha a sem a.  Rajiv Nagar I leh II a tanpuina dawngtute hi an training-na  lehkha vawiina an dawn hmang hian an Account atang pawisa  hi lakchhuah theih a ni ang. Bialtu MLA chuan tanpuina dawngtute chu an trade thlan ngei hmanga hmala turin a ngen bawk a ni.

Rajiv Nagar Tourist Lodge thar lawmna pual inkhawm hi Pi Zonunthari, Under Secretary Tourism chuan a kaihruaia, Pu Lalhmansanga, Deputy Director, Tourism Department chuan lawmthu sawina a nei bawk.

Pi Lalthakimi Pachuau, Deputy Director Technical Report peka alan danin Rajiv Nagar Tourist Lodge hi  136.07 sq.m a ni a, mizopa chhiara chhawng 3 niin, Ground Floor ah hian Reception, Lounge Area, Kitchen leh Dining Hall te  a awm a ni, a chung chhawng 2 ah hian mikhual room dahkhah a  ni bawk. Building sak hna hi ni 23 Oct 2017 atanga tan niin Oct 2, 2018 ah zawhfel a ni.

Vawiin vek hian BADP sum senga Rs  20 lakh senga sak Young Chakma Association Hall chu a hawng nghal bawk.

Bialtu Minister hi Tourism Department hotute  bakah Pu Z. Lalthanzuala, District Soil Officer, khawtlang hruaitu te'n an tawiawm a ni.

Attachment

  • Loading attachment...