Pu John Rotluangliana Minister Food Civil Supply & Consumer Affairs Bialtu MLA ni bawk chuan a bial chhung khua Mamit, phaizau leh Nalzawl khuate a tlawh.

Bialtu Minister hian heng khua a tlawhna ah hian amah lo lawmtu khawtlang hruaitu leh mipuite hmaah thusawiin kan hmalawka kristian te hunpui krismas lo thleng tur chu hlim taka hmang turin duhsakna a hlan a.

Tun tum thlasik thutkhawma buhfai chhia sem chungchanga zawhna awmah thudik zawk mipui ten kan hriat a ngai a ni tiin buhfai chhia ei tlak loh chu semchhuah a nih ngai loh thu sawiin Retailer in buhfai bag tam tak an lak zinga bag hnih khat sem chhuah loh tur an dah chu buhfai chhe sem anga sawi mai a nih thu a sawi.

Bialtu Minister chuan sorkar hmalakna leh hmasawnna hrang hrang tarlangin kum 2019 hian Rail chuan Sairang a rawn thlen beisei a ni tiin Tuirial Hydel Project 60 mw pechhuak thei tur pawh kumthar hian hawn tum a ni a ti a, hei hian eng lama mizoram kan harsatna tamtak a phuhruk dawn a ni a ti. Mamit District tana kawng pawimawh tak Bairabi kai Tlawng Luia Lei dawh mek chu March 2017 hian zawh theiha peihfel hman a nih dawn thu a sawi bawk. Sorkar chuan thalai te hmakhua ngaiin infiamna lamah hmasawnna atan Mizoram chu NE ah Artificial Grass phah tam ber kan ni a ti.

Pu John Rotluangliana Bialtu Minister chuan a bial chhung Phaizau khaw panna kawngpui siam turin PMGSY hnuaiah DPR Central sorkar ah thehluh fel a ni tawh a, Mamit khawpui chawmtu tui chu thal lai pawha harsatna awm lo turin engkim ruahmanna siam vek tawh tawh a ni tiin, Bialtu MLA hian a bial chhung Nalzawl kawng siam thatna turin Western Development Fund sum atangin cheng nuai 20 dah a ni a ti bawk.

Bialtu Minister Pu John Rotluangliana hi Pu Lalramngaia PS leh DIPRO Pu Paul Rokima chuan te’n an tawiawm a ni.