Nimin khan Pu Lalrinmawia Ralte, Minister Of State, Environment, Forest & Climate Change etc chuan a bial chhung Zomuantlang khua tlawhin an khaw hmasawnna tur hrang hrangte an khawtlang hruaitute nen an sawiho.

Zomuantlang Community Hall-a vantlang inkhawm buatsaih-ah thusawiin Minister chuan miretheite hma khaw ngaitu Sorkar hnuaiah Zomuantlang khua-in hmasawnna tam tak a hmuhte vanga khaw mipuite'n lawm nachang an hria chu entawntlak a tih thu sawiin Zomuantlang khua chu Reang (Bru) lo kir tur chhungkaw 350 awmna tura ruahmanna awm mek anih avangin khawtlang mamawh hrang hrang, inkalpawhna kawng siamna atan te, Community Hall tihlenna atan te, Playground siam nan te, Electric atan leh Solar Pump siamna turin Cheng Nuai 92 chu Zomuantlang khua tan dah anih thu a sawi.

An bial hmasawnna tura KDZKT Road laih mek chungchang sawiin Project lian tak hna thawh mek anih vanga kawng chhia thawm that theih loh a awm pawh phunnawi mai lova hmasawnna tur hnathawh a ni tih hriaa dawh hram hram turin mipuite a ngen bawk a ni.

Minister chuan thalaite tana eizawnna kawng dap kawngah Sorkarin hma a la chho zel a, thalai tam takin eizawnna tha hmuin mi puitlingah a siam tawh a, mi puitling tam tak a chher chhuak zel bawk ang a ti bawk.

Minister hi PS Pu Lalthakima, PS chuan a tawiawm a ni.