Pu John Rotluangliana Hon’ble Minister, Supply etc Minister chuan nimin Dt 10.January 2014 khan D.C Conference Hall, Mamit ah Mamit District chhunga Department hrang hrang hotute a kawm.

Inkawmkhawmna hi District Bawrhsap Pu V. Lalremthanga IAS in kaihruaiin Bawrhsap chuan Mizoram sawrkara dinhmun sang leh pawimawh tak cheltu Bialtu MLA kan neih avangin District mipuite aiawhin lawmpuina leh duhsakna a hlan a ni.

Pu John Rotluangliana Minister, FCS&CA, etc chuan thusawiin District hmasawnna tura Department hrang hrang hotute hnathawha lawmthu hrilhin thawhhona boruak tha tak kan neihte chhunzawma District in hmasawnna nasa zawk kan neih theih nan tan lakpui turin Department hotute chu a sawm bawk a ni.

He inhmuhkhawmna hunah hian Department hrang hrang hotute pawhin an hmalakna te leh harsatna Department anga an tawhte Minister hnenah hian thlenin Minister chuan lo enzui puia a theih ang anga hmalak chhoh zel a nih tur thu a sawi bawk.

He hunah hian Mamit District chhunga Department hrang hrang hotute an tel tha hle a ni.

Pu John Rotluangliana Minister, FCS&CA etc, Bialtu MLA ni bawk chuan Dt 10-11 January 2014 hian Mamit chhehvel khua, Nalzawl, Bawngva, Phaizau, Vawngawnzo, Damdiai, Suarhliap, Dampui leh Dapchhuah khua te tlawhin khawtinah mipui in ropui takin an lo hmuak a, khawtina amah lo hmuaktu mipuite hma-ah thusawiin hetianga hlawhtlinna pawimawh tak a chan theihna chhan hi Bial mipuite thawhrah a ni tiin lawmthu a hrilh a ni.

Supply Minister chuan ei leh barah Zoram mipuite chhuanchhama kan awm loh nan theih tawp chhuah a tum thu sawiin hetih rual hian mitinte pawh sawrkarah chauh in nghat lova kan eizawnna theuhvah hlawhtling ngei tura hma la turin a chah bawk.

Supply Minister hian Dt 11 January 2014 hian Mamit-a DCSO Office leh Supply Godown a hmunah a tlawh bawk a ni.

Minister chuan November 23, 2013-a Bru Misualte’n an rukbo te chhanchhuak turin sawrkarin theih tawp a chhuah a ni tiin hun reiloteah him taka an lo chhuah beisei a nih thu a sawi bawk.

Pu John Rotluangliana Minister FCS&CA etc hi a nupui Pi Vanlalhruaii, Pu Vabeiha Hlychho Director Tourism, chhungkhat laina te, Party hruaitute bakah Mamit atangin Department hotuten an tawiawm a ni