Pu John Rotluangliana, Transport Minister chuan tukin khan ZDU Gen. Headquarter office Chaltlang Lily Vengah Zoram Drivers’ Union huaihawt 36th Road Safety Week ( Fimkhurna Hapta) 29th November - 5th December, 2016 a hawng. Hawnna inkhawm hi Pu C. Vanlalsanga, President, ZDU Gen. Hqrs. in a kaihruai a. Hawnna inkhawmah hian Pu R. Remmawia, Transport Director, Pu C. Lalthanmawia, Traffic SP te leh Transport Department hotu dangte an tel a ni.
Pu John Rotluangliana chuan ZDU hi Mizoramah Association senior pawl tak a nih thu te, ruihhlo leh tangpui ngaite an enkawl thin te bakah Mizoram tan hna an thawk nasa hle a ni. Sorkar chuan Road Safety hi a ngai pawimawh hle a, mipuite himna turin nasa takin hma a lak thu sawiin Minister chuan hemi atan hian Aizawl ah Road Safety Council din a nih thu leh District ah te Road Safety Committee din a nih tawh thu te a sawi a.
Mizote hi lirthei khalh hma tak kan ni a, mahse traffic dan (Rules) chungchangah duh angin kan zir chiang lo hi a pawi a ni tiin Minister chuan Traffic Rules zir leh hriatchian a pawimawh thu a sawi bawk a. Motor khalh chungchangah ramdang miten an ram ang lo taka Mizoramah horn hmeh rik tuar tuar a awm lo hi min fak thin a, mahse tun aiin Motor khalh tute hian hawihhawm zawk leh midangte tana harsatna siam lo a motor khalh tum lehzual theuh turin Minister chuan a chah bawk. Tunlai Motor hi a changkang tawh hle a, Accident tam tak hi Motor fail vang ni lovin driver te kan fimkhur tawk loh vang a ni thin a, chuvangin Road Safety Week kan hman atang hian finkhur leh zuala Motor khalh theuh turin Minister chuan a chah bawk a ni.
Zoram Drivers’ Union te hian 1980 October atang khan kumtin Road Safety Week hi an lo huaihawt thin a, vawiin pawh hian Mizoram hmun hrang hrangah he Week hawnna hi hman a ni.
