Nimin leh vawiin khan Pu John Rotluangliana, Food Civil Supplies &Consumer Affairs, Tourism leh Transport chuangtu Minister chuan a bial chhung khaw engemawzat a tlawh a, hneh taka thlan tlin anih avangin a bial mipuite hnenah lawmthu a sawi a ni. Minister hian Lengpui, Lengte, Nghalchawm, Serzawl, Rawpuichhip leh Hmunpui khua te tlawh a, heng khua ah te hian mipui ten amah lo lawmin vangtlang inkhawm an neihpui nghal a ni. Minister hi a nupui fanau te, party hruaitute te bakah Sawkar mi pawimawh thenkhat ten an tawiawm a ni.

Heng khua ah te hian thusawiin Pu John Rotluangliana chuan party pakhat tana thlan tlin ka ni lova kan zavai a tan leh Mizoram tan thlan tlin ka ni a, chuvangin party in beihna bansan a inthlan boruak theihngilh a, khawtlang, ram leh hnam leh hmasawnna atan ngaihtuahna sengin thahnemngai takin theitawp I chhuah tlang theuh ang u, a ti. Party nihna te dah tha a, party inepna leh innghirngho-na te theihngilha a, rilru tinatu te ngaidama ram leh hnam tan mahni hna thawhna zawn theuh a theitawp chhuah turin mipuite te chu a chah a ni.

Minister chuan mipuiin buhfai an tlakchham loh nan Sawrkar chuan chak taka hma a lak mek thusawiin phai lam atanga buhfai kan lei thin chu tih tlem a, Mizoram leh Mizopa buhfai tharchhuah ngei local purchase kaltlangin a tam thei ang ber lei tum a ni, hemi atan hian ruahmanna siam mek leh hmalak mek a ni, a ti. Hemi atan hian District tina Agriculture Office-ah te lehkha thawn a nih tawh thu a sawi. Mizoram buhfai tharchhuah local purchase hmanga Sawrkarin a lei theih chuan phai lam buhfai ringawt ah innghat lovin mahni tharchhuah ngei engemawzat kan lei thei dawn a, hei hian buhfai tharchhuah tam lamah tan min lak tir thei dawn a ni, a ti bawk.

Pu John Rotluangliana chuan ei rawngbawlna gas chungchang sawiin gas a harsat changin mipuiin Sawrkar an mawhpuh thin a, supply officers te leh Gas agent te nen vawi engemawzat hemi chungchang hi an sawiho hnuin gas chungchang, a bik takin a sem danah Sawrkar chu tun hma ang chuan in rawlh tawh loh se tih rel a ni, a ti a. Amaherawhchu agent ten harsatna engpawh an neih chuan a sutkian nen engtik lai pawhin Sawrkar chu a in hawngin, an mahni pui turin Sawrkar chu a in ring reng a ni, a ti. Gas-a special permit pek anih tawh loh tur thu a sawi bawk a. Hun engemaw chen ration-a chini sem tawh loh anih hnuin Chief Minister-in hemi chungchangah chak taka hma a lak avangin 2014 kumtir atang khan sem leh a nih tawh thu Minister hian a sawi bawk a ni.

Kum nga kalta khan Sawrkar chuan Mizoram hmasawnna atan theitawp chuahin hma a la a, Sawrkar hmalakna thenkhat te chu nakin lawka hawn theiin a hlawhtlinna kan hmu dawn a ni, a ti a. Hmachhawp tam tak kan nei a, chungte chu Sawrkar tharah hian chak taka bawhzuiin hma kan la zel dawn a ni, a ti bawk.

Kawng hrang hrang a bial tih hmasawn nan leh chak taka hma a lak zel theih nan amah tanpuia finchhuah turin mipuite a ngen nghal bawk a ni.