Vawiin pathianni chhun dar 12 khan Pu C. Ngunlianchunga, Minister of state, AH&Vety chuan Lawngtlai District a All Vehicles Owner & Drivers' Association (AVODA) hotute chu DC Conference Hall ah ko khawmin, sawrkar Department thenkhat hotute nen meeting a neihpuia, Asssociation hotute chu February ni 10 atanga tiamchin awmlova total band neih an tumchu thulh turin a ngen.

Vawiina thutkhawmna Lawngtlai Bawrhsap Pu J Hmingthanmawia kaihhruaia neihah Lawngtlai District ZDU hruaitute leh Lirthei hrang hrang neitu leh enkawltu lam hruaitute chuan hun rei tak kalta atanga Lawngtlai panna kawng leh a khawchhung kawng a that ve theihna tura an hma lak dan leh sawrkar hotute an lo dawr tawh dan tarlangin Inremna Thuthlung hial an lo ziah tawh thu an sawia, amaherawh chu chung inremna an lo ziak tawhte chu vawiin ni thlenga tih a la nihloh avang leh hma lak tumna hmel reng reng a la awmloh avangin Lawngtlai mipuite ngaihthahna nia an hriat thu an sawia, tun thal chhunga siam a nihloh cuan tuiluankawrah motor kan khalh takngial dawnin kan hria ani an ti a.

Hei hi sawifiahin Minister chuan Pathian leh Lawngtlai mipuite zara ka lo tlin ve atanga ka vei ber leh kan hotute hnena ka sawi tam ber chu kawng hi ani a, PWD Minister pawh ka hmuh tawh bakah vawi duailo kan inbe reng bawka, kan harsatna tawh mek hi hriain min ngaih ven tak zet ani a ti a, kumin thal chhung ngeia pawisa awm ang anga khawchhung kawng min siam sak a tiam a ni a ti bawk. Sawrkar thar siam atangin hun a la reilo ema chak taka hma lak a har a, mahse kumin furah hian tuiluankawrah motor tumahin kan khalh lovang khawchhung kawng nuam tak kan nei hman ang chu chu helai bialtu ka nihna ang pawhin ka mawhah ka ngai a ni a ti. Nitina hnathawklova awm theilo, mi harsa te te te eizawnna ti sukuk zawnga band huaihawtlo hram turin a ngen a.

PWD lam aiawha thusawitu Pu Malsawmdawngliana, SE, Multimodal Project Circle pawhin thusawiin hun kalta atanga Lunglei leh Lawngtlai inkar kawng leh, Lawngtlai leh Zero Point inkar kawnga harsatna an tawh dan leh hma an lak dan report pein hetiang dinhmuna kan awm chhan chu Contractor tura thlan Bengal Prakalpa, Kolkata ten hna an thawh theihloh vang ani a ti a. Lunglei leh Lawngtlai inkar hnaah phei hi chuan ban an ni tawha, project thar siama tihthat vek a ngaih avangin tihthat nghal vek a ni bawka tunah hian a sanction lam buaipuiin kan hotute an awm mek a ni a ti. Lawngtlai khawpui leh Zero thlenga contract hna pawh Show Cause Notice pek niin naktuk 3.2.2014 hi last date a ni tawha, chhanna tling a awmloh chuan contract titawp tura hma lak ani ang a ti bawk. Dan hnuaia inremna thuthlung ziah a nih tawh avangin Department lamin duh hun hunah kut a lo thlak ngawt theihlohva, dan ang bawka thil engkim kalpui angaih avangin thil a tih thuai thuai hleihtheihloh ani amaherawh chu kan department changtu Minister-in thahnem a ngaih em avangin fur hma hian khawchhung kawng hi chu kan zawh hman ngei kan in beisei an ti bawk.

Lawngtlai bawrhsap pawhin hetiang thil a lo awm tak avang hian meeting tura zin a tum pawh kal hun a sawn thu sawiin chuvanga hetianga chawpchilh taka meeting neih lo tulta a nih thu sawi hmasa in kawng tha chu mi zawng zawng te duhthusam kan zavai tana thil tha a ni a, amaherawh chu nawrh huaihawt zawnga hma lo lak chu sawrkar leh a thawktu Department tan pawh sukukna a siam sak palh thei zawk ani tiin Association hruaitute chu an hmalakna chawlhsan turin a sawm a. Hemi hnu hian AVODA hruaitute chuan band huaihawt hi an thil duh ber a nihloh thusawiin Minister zahawm tak leh Bawrhsap ngenna chu zahawm an tih thu sawiin ngaihtuah thatleh an intiam a, band tan an tum ni hmain chawlhkar khat lai a la awm avangin hemi hun chhunga sawrkar hmalaknate thlir zuia PWD hotute nen pawha in be pawp reng tura inrem chungin meeting hi tih tawp a ni.

Vawiina meeting-ah hian Lawngtlai AVODA hruaitute, Central YLA hruaitute bakah sawrkar lam aiawh mi engemawzat an tel a ni.