Kum 2014 – 2015 atana Rashtriya Swasthya Bima Yojana (RSBY) leh Mizoram State Health Care Scheme (MSHCS) hnuaia inziah luhna kumin bik tana hmasaber chu vawiin khan Govt. Complex, Luangmual-ah buatsaih a ni a, he hun hi Health Minister Pu Lal Thanzara chuan hmanpuiin inziaklut mipa panga hnenah damloh ni khuaa RSBY atan hman tur Smart Card a hlan nghal bawk a ni. 

Health Minister Pu Lal Thanzara chuan heng ruahmanna pahnih chu thil inang nih mahse thil hran ve ve ni chungin thil kalkawp leh hmankawp thei anih thusawiin heng scheme in a huam chin mitin te chu hemi chungchang ngaivena inziaklut turin ka ngenin ka chah duh che u a ni, a ti. Mi harsa, mi chanhai leh Sawrkar-a MR bill thei lo te tan thil hmantlak, damloh nikhua a innghahna tlak a nih thu sawiin a hunbi chung a inziahluh a pawimawh avangin in hmakhua lawkna chang hria a inziaklut ngeia heng hriselna chungchanga Sawrkar ruahmanna chu ngaipawimawh leh hmang tangkai turin mipuite a sawm.

Pu Lal Thanzara chuan RSBY chu 2010 leh MSHCS chu 2008 atanga hlawhtling taka kalpui anih thusawiin RSBY kalpui naah hian Mizoram chuan National Award a zawnin tum hnih, 2012 leh 2013 khan a dawng hial tawh a ni, a ti. RSBY in tun hma in Below Poverty Line (BPL) chhungkua chauh a tuam thin thu sawiin kumin atang chuan MGNREGA Job Card neite leh AMC hnuaia street vendor te pawh a huam dawn tawh a ni, a ti. RSBY leh Healthcare Scheme hman kawp dan chu thenawm state te pawhin an rawn zir thu leh Meghalaya chuan Mizoram kalpui dan chu an rawn entawm chho ve mek thu Minister hian a sawi bawk a ni.

RSBY hi Central Sawrkar ruahmanna niin kum 2010 atang khan tan in Health & Family Welfare Department in an kalpui mek. He scheme hian BPL, MNREGA Job Card neite leh Street Vendor te a huam a, List hi khua leh veng tina Health Worker-te leh VC leh Local Council ten an survey a ni. Registration Fee cheng 30 chawiin  an inziaklut thei a. Chhungkaw pakhat tan kum khatah Damdawi In inenkawlna cheng 30,000 thleng a thlawin Sawrkar-in a tum sak thin a ni. Inziak lut te hi an thlalak leh an kutzungpui thla nem kai  hnuah Smart card pek vek an ni a, chu chu Damdawi Ina an in admit hunah hman tur a ni. RSBY hnuaia hian nikum January leh December inkar khan bill 15531 pek tawh niin bill an pek chhuah tawh zat chu cheng 8,09,48,864/- a ni.

Mizoram State Health Care Scheme (MSHCS) hi kum 2008 atang kalpui tan tawh niin hei hi State sawrkar ruahmanna a ni a. He scheme hian RSBY BPL leh APL(MGNREGA Job Card neite leh Street vendor te) leh APL pangai, Sawrkar hnathawk lo emaw thawk emaw, State leh Central Sawrkar atanga MR bill thei lo zawng zawngte a huam thei vek ani. Voter Card kengin mahni veng.khau Sub-Centre-ah inzaihluh thei a ni. Chhungkua member 5 chin tan cheng 500-a in register-in cheng nuai khat thleng a bill theih a, cheng 750-a in register-in cheng cheng nuai hnih thleng a bill thei a leh cheng 1000-a in register-in cheng nuai thum thleng a bill theih a ni. Chhungkaw member panga aia tam naah chuan member pakhat zelah cheng 100, cheng 200 leh cheng 300 te pek belhin cheng nuai khat, cheng nuai hnih leh cheng nuai thum te a bill theih dawn a ni. MSHCS hnuaia hian bill 7141 pek tawh niin  bill an pek chhuah tawh zat chu cheng 7,01,61,527/- a ni. MSHCS hian natna khirh tak tak Cancer, lung lampang, zunkawng bakah a vaiin natna hrang hrang 120 a huam a ni.

BPL tan bik RSBY Top-up Scheme siam a ni a, registration fee cheng 30 an pek bak engmah dang bekbelh ngai lovin Health Care Scheme-ah automatic-in ziah luh an ni a, RSBY cheng 30,000 bakah MSHCS hnuaia cheng 2,70,000 thleng cover an ni zel. BPL lo tan chuan Health Care Scheme hnuaia registration pangai pek a ngai.

He Scheme pahnih te hi kum 2014 – 2015 (1.4.2014 to 31.3.2015) chhunga hman atan inziah luhna hun hawn tan mek a ni a. April 2014 thlang hawn a ni ang. Sub-Centre-ah inziahluh theih a ni a, RSBY tan bikah hian chhungkaw kima thlalak a ngaih avangin leh an kutzung tang (fingerprint) nem a tul avangin a hun leh a hmun ngaih pawimawh tur a ni ang. Veng leh khaw tinah a hun leh hmun chu VC leh LC kal tlanga inhriattir thin a ni.