Tukin zingkar hian Food, Civil Supplies and Consumer Affairs Department leh Transport Department Minister Pu John Rotluangliana chuan Lawngtlai a DCSO Office, Supply Department Godown, FCI Godown leh District Transport Office te a tlawh.

Pu John Rotluangliana chuan kan rama DCSO Office te leh Godown te hi a sakna a rei tawh hlawm avangin thuam that an ngai tawh viau a, a theih ang anga thuam that thuai a nih theih nan ruahmanna siam a tul tawh hle a ni a ti. Lawngtlai Supply Department Godown luhna kawng leh buhfai hlanthlakna lai chhe zualte chu siam nghal dan tur ngaihtuah a ni ang a ti bawk. Lawngtlai a Food and Civil Supply Godown ah hian buhfai Quintals 9000 vel a dah theih a, tunah hian Quintals 2600 chhekkhawl sa a awm mek a, furpui lo thleng tur atan a thlaphan awmloh thu a thawktuten Minister hi an lo hrilh a ni.

Minister hian FCI Godown pawh a tlawh nghal a “FCI hi Central sawrkar ta ni bawk mahse Mizoram mipuite ei tur min rawn chhawp hnai saktu an nih avangin ngaihthah ngawt theih an nilova, kumin October thla atang hian Bairabi Rel kawng zauh hna thawh tan a nih dawn vang leh chutih chhung zawnga Truck hmanga phai atanga buhfai thiar a ngaih dawn avangin FCI lam pawhin ruahmanna fel tak an siam a tul a ni” a ti bawk. Lawngtlai FCI Godown ah hian buhfai Quintals 34500 a dahkhawl theih a, tun dinhmunah Quintals 9000 awmin hei hi a tha tawk hle niin Godown enkawltute chuan Minister hi a lo hrilh bawk. Minister hian District Transport Office pawh a tlawh nghal a, Bungtlang South khua in an khua leh Lawngtlai inkar a MST Bus tlan tir tura an dil chu lo enfiah turin DTO Office a thawkte a hrilh a ni.

Lawngtlai khawpui a Office a tlawh kualna ah hian tuna Lawngtlaia cham mek AH & Vety Minister Pu C. Ngunlianchunga chuan a tawiawm a, tin Minister hi Aizawl atangin Pu C. Zasanga, Addl. Director, FC&CA Department leh Pu L. Lalbiakthanga, Joint Director, Transport Department ten an tawiawm bak.

Minister hian Lawngtlaiah tukthuan a ei nghal a, hemi hnu hian Aizawl lam panin a chhuak leh nghal a ni.