Industries Minister Pu H. Rohluna chuan nimin khan Kolasib Sub Hqrs YMA huam chhung khaw hrang hrang leh Guwahati, Shillong leh Silchar Mizo Welfare te hman tur Mau atanga mawi taka siam Mithi Kuang 63 (Ready to assemble Coffin) chu CEEKE BAMBOO & WOOD PRODUCTS Factory, Thingdawl atangin a hmangtu turte hnenah a hlan.

Hlanna inkhawm hi Ceeke Bamboo & Wood Products Factory , Thingdawlah neih a ni a. Heng kuang tehi National Mission on Bamboo Application (NMBA) ten a siamna tur pawisa tumin Factory neitu Pu Lalthanpuia, Managing Director, Ceeke Bamboo hnenah an hlan a. Tun tumah hian kuang 63 pek chhuah phawt a ni a. A zavaia an sanction zat chu kuang 250 siamna tur a niin hemi atan hian NMBA chuan Rs 165 lakhs a sanction a, kuang dang hi nakina la sem chhuah leh tur a ni.

Thu sawiin Pu H. Rohluna chuan, Mizoramah thing zai tur nasa taka a kiam tawh laia Mau hmanga thil dehchhuah kawnga Ceeke Bamboo-in hma a la chu lawmawm a tih thu sawiin, kan ramah Mau tam thu kan sawi fova. Hei hi a ram neituten eng chen nge kan chhawr a kan hlawkpui chiah tih hi nasa takin kan ngaihtuah thin a, hei vang hian kan term hmasa-ah kum hnih chhung ngawt chu Mau thawnchhuah pawh kan khap nghe nghe a, amaherawhchu Central lam nawrna nasa tak leh Cachar Paper Mill ngei pawh khar mai tul hiala a lan tak avangin chu chu thiah leh a nita a ni, a ti. Bamboo hmanga khawl din tawh engemawzat chu a hnua hlawhchham khar ngai a nih thin avangin rilru a ti hnual thin a.Industry dintute hian kahpah thil maia ti lova hloh deuh pawh inhuama teirei peih a tul hle a ni, tiin Factory a thilsiam pawh quality tha leh tlo, hmel mawi tak siam chhuah ngei tum nise, khawl hman tepawh a man to tha chi kan zawn a pawimawh a ni, a ti.

Pu Rohluna chuan, Loan latu tamtakin ba kan rulh duhloh thin avangin kan Financial Institution tepawh ba thing institution ah kan chantir a, hei hi kan tu leh fate hmalakna tur kawng daltu a nih avangin a pawi hle a ni, a ti a. Mizoten rilru thar kan put a hun ta takzet a, Industry din tur chuan kan thil chin te Mau a ni emaw thildang a ni emaw, ram hlawm zau tak bawha kan chin pawh a hun ta a ni, a ti a. Mizoramah thing zai tur a vang ta a, sik leh sa pawh hei vang hian a danglam nasa hle a. Thing ti puitling tura kum 20 a ngaih laiin Mau chu kum 4-ah a puitling thei a. Chuvangin kan ram tihring tur leh sum hnar ni bawk Mau chin hi kan uar a ngai a ni, a ti a ni.

Pi R. Lalrodingi, Joint Director, Industries, he hun kaihruaitu chuan Ceeke Bamboo Industry chu Mizorama thil thar Mau hmanga remhre taka Kuang siamchhuaktu an ni chu ropui hlea a hriat thu leh hei hi thil zawngchhang thlak tak nia a hriat thu a sawi a . NMBA, Delhi atanga lo kal Pu Krishna Kumar, Scientist chuan, thing sawngbawl tur a van chhoh zel avangin a thlakna tur Mau hmanga thil siam chhuah a, Mau chin pun leh hman tangkai hi keini chuan kan tum ber a ni, a ti.

Ceeke Bamboo Industry hian kum 2008 tawplam atang khan Mau hmanga thilsiamin bul an tan chho a, an khawl bun ten misual beih leh rawk a tawh nual bakah transformer te vawi hnih tekin a denchhiatsak bawk a. Harsatna tamtak paltlangin tunah hian Bamboo mat, Dap-Board,Jute Board,Eco smat board leh Teak faced Board te tluang takin an siam a ni.

Minister hian Factory a hnathawh dan leh khawl zawng zawngte a fangkual bawk a ni.