Khawvel hmun dang rualin vawiin khan Mizoramah pawh World No Tobacco Day hman a ni a. Aizawl-ah chuan a lawmna inkhawm hi Millenium Centre kawtah Health & Family Welfare Minister Pu Lal Thanzara hovin neih a ni. Nimina Mizoram State Tobacco Control Society leh Indian Society on Tobacco & Health (Mizoram Chapter) tangkawp inkhawmin a lo puan tawh angin kumin atan zuk leh hmuam atanga chhiah lak tihpun “Raise taxes on Tobacco” tih chu thupui atan hman a ni.
Health Minister chuan India ram mai pawh nilo, khawvel huapa zuk leh hmuam hmang tamna ram ah Mizoram a lang chu thil zahthlak tak anih thu a sawi a. Meizu thin te hian an taksa ah natna leh harsatna hrang hrang an tawh thin mai bakah, an chenpuite, engmah ti ve ngailo pawhin mei khu an lo hip ve thin avanga natna tuar phah te pawh an awm thin thu a tarlang bawk a. Vaihlo leh a kaihhnawihte do rem turin Sorkar hmalakna mai bakah Kohhran, tlawmngai pawlte leh mitinin mawhphurhna kan nei theuh a ni, Pu Lal Thanzara chuan tiin, kalkhawmte chu vaihlo do kawnga tan la turin a sawm a ni.
He huna thusawitu dang Pi Lal Riliani, Indian Society on Tobacco & Health (Mizoram Chapter) President pawhin vaihlo chu ‘tur nung’ a ni tiin, a ngawlvei lo tura inhrilhhriat thar leh a pawimawh thu a sawi a. Ram hmasawn tur chuan a cheng mihringte an hrisel a ngai a; hriselna kawng pakhat chu vaihlo leh a kaihhnawih laka fihlim hi a ni, Pi Lal Riliani chuan a ti.
Vawiin hun hi Dr. Lalbiakkima, Director, Hospital & Medical Education chuan kaihruaiin, Dr. B. Thangdailova, Sr. Vice President, Indian Society on Tobacco & Health (Mizoram Chapter) hovin kalkhawmte chuan meizu lo turin leh a zu thin te chuan sim tawh tura intiamna thu an sawiho bawk.
