Tourism Department Office tur Tourist Facilities Centre, New Secretariat Complex a sak mek chu tukin zing dar 9:30 khan Tourism Minister Pu John Rotluanglianan a hmunah kalin a fang kual.

Mizoram pawn amite kan rama zin tur leh tlawh tura kan hipna kawnga hmala tu pawimawh tak chu Tourism Department te an ni tiin Pu John Rotluangliana chuan tuna Tourism Department building tur sak mek luah theih mai tura a awm tawh chu lawmawm a tih thu sawiin tun aia chak zawka kalpui anih theihna turin theih tawpa puih a in huam thu a sawi a. Aizawl bakah District hrang hranga Tourist Lodge sak mek leh chei that mek te chu a hmun ngeiah kal chilha enfiah a tum thu sawiin, Tourism awareness neih zel tum anih thu a sawi bawk.

Minister chuan kum khat vel chauh la ni mahse nasa taka hna an thawhna a taka a hmuh theih leh chhawr theih a ni nghal chu lawmawm a tih thu a sawi a, Tourism hmasawnna mai bakah Supply Department ah pawh an hnathawh rah a lang tawh a ni tiin tunhma a FCI atanga buhfai Mizoramin a lo lei thin Kg. khat Rs. 29.81 chu local supply atangin Rs. 25.75 a leiin thla khata quintal 80,000 chuang an lei thinah cheng vaibelchhe 3 chuang sum hum anih tak thu leh ration buhfai man Rs. 9.50 a hralh thin Rs. 15.00 a hralhin cheng vaibelchhe 4.40 heta tang hian mipui sum hman tura hlan a nih thu a sawi a. Hetiang zel a nih chuan kum khat atan cheng vaibelchhe 91.776 chu Mizoram mipui tan hum theih a beisei thu a sawi a ni.

VIP Quota tih tawp a nih tawh thu sawiin Pu John Rotluangliana chuan Buh leh Bal ah kan ram intodelh tura tan la in ramdang mi ten kan state tlawh an duh theih nana hip thei turin kan tanrual a ngai tiin rinawmna leh taimakna, faina kawngah theih tawp chhuah turin mipuite a ngen a ni.

Tourism Facilities Centre sak mek hi 929.22 Sq. Metre zopa chhiara chhawng 5 a ni a, tunah hian zaa 95 sak zawh tawh a niin thla thum hnu velah chuan luah theih tura beisei a ni.

Minister hi Tourism Director Pu Vabeiha Hlychho leh Pu Biakthanmawia, Jt. Director leh PWD hotute leh official pawimawh ten an tawiawm a ni.