Vawiin khan Pu John Rotluangliana, Minister, FCS&CA, Transport, Tourism chuan Mamit Venghlun Branch YMA Diamond Jubilee Building thar a hawng.

Building thar hawngtu Pu John Rotluangliana chuan thalaite ruihtheihthil laka kan fihlim theih nan YMA-te'n Sport lam leh hna thawhna lam kawngah nasa taka kaihhruai a ngaih thu a sawi a. Nu leh pate thu ai mahin thalai hruaitute thu an awih duh thin zawk avangin  kan thalaite hmakhaw ngaia, nun kawng dik an zawh theihna tura hmalatu pawimawh tak chu YMA a nih thu a sawi a. Kan thalaite chuan Social Media ringawt buaipui lova, lehkhabu tha chhiar tam tura infuih thar turin a chah.

Kan Social Media, heng Facebook leh WhatsApp-te tangkai zawka hman a nih theih nan YMA hruaitute'n mawhphurhna sang tak kan nei tiin thil belhchiandawllo hre hmasatu nih tum lova, hriatna zau zawk neih phahna atana hman tum turin thalaite a fuih. Building hawn thar chu vantlang ta a nih angin duat tak leh uluk taka enkawl zui turin YMA Members te a chah bawk.

Vawiin Minister-in Diamond Jubilee building thar a hawn hi MLA Fund atanga sak niin cheng Nuai 2 senga sak a ni a. He building hi Public Library Cum Information Centre atana hman tura ruahman a ni.

Pu John Rotluangliana Minister hian Venghlun Pa a nih angin Building hawn thara hman tur Computer leh Printer a pe a ni.

Vawiin Venghlun Branch YMA Diamond Jubilee Building hawnna Programme hi Pu Laltlankima, President, Venghlun Branch YMA-in a kaihruai a. Vanlalhruaia, Asst. Secretary-in Technical Report pein Pu Ngurthansanga Sailo, Vice President, Venghlun Branch YMA-in kalkhawmte hnena lawmthu sawina a nei a ni.