Tun hnai ruah sur nasa avanga Serchhip dai, Sailiam kawn bula NH 54 kawngpui meter 100 vel zet min bal chu PWD Highway leh Serchhip DDMA tangkawp chuan tun kar chhunga sial tlang leh tumin hna an thawk mek.

He kawng bal siam that dan ngaihtuaha sawiho tur hian PWD Highway Chief Engineer Pu K. Lalsawmvela chuan inrinni kal ta (dt 1.6.18) khan Serchhip rawn tlawhin Serchhip District Disaster Management Authority Chairman leh Official pawimawh dangte nen a hmunah an en hova. He lai kawng hi a min nasat avang leh kawng zauh/a thar laihna tur ram chu mimal ram a lo nih bawk avangin a bawhzui dan tur sawi ho a ni a. NH 54 hi Double lane-a sial tura hmalak (survey) mek a nih tho avangin he Double Lane Project hnuaia helai ram neitute ram hi lak sak tura inbiak fel a nih chuan hna hi thawh nghal mai theiha a lan avangin Bawrhsap Pi Sangchhin Chinzah chuan ram neitute a be nghal a, ram neitute pawhin harsatna siam lovin NH 54 min siam thar hna hi thawh theih a ni ta a ni.

Hetianga he kawng min thawh theih a nih tak avang hian PWD Highway Division chuan nimin Pathianni zing dar 8:00 atang khan khawl pakhat dah nghalin hna hi thawh tan nghal a ni a. Leh lam sir atanga hma lo la ve nghal turin tukin (vawiin) zing dar 10:00 a.m atang khan khawl pakhat an dah belh zui leh ta bawk. PWD Highway Engineer te chuan khuain a zira, a leiah lung tam tham takte a lo awm lo hlauh a nih chuan tun hapta chhung ngeia he kawng hi tih tlang an tum thu an sawi a ni. Kawng hi laih tlanga, Boulder phah phawt tura ruahmanna siam a ni. Tin, he kawng Diversion, DDMA in hmanhmawh taka a siam Hriangtlang road to Dawngzawl pawh Serchhip Addl. DC Pu Chuauhnuna chuan a theih ang anga chei zel rih a nih tur thu a sawi a, a hlauhawm zualpui tihnep nan Boulder te pawh phah tum a nih thu a sawi. NH 54 a pin tukah khan Serchhip DDMA chuan he kawng (9 kms approx) hi hmanhmawh takin a chei nghal a, NH 54 pin atanga darkar 48 chhungin lirthei te chi (4x4 drive) tana kal theihin a peih hman a, tunah chuan Sumo thenkhat pawh an kal tawh niin an sawi. Tin, Serchhip khaw chhung, Tuikhuah Veng Baptist Biakin thlanga NH 54 tlahniam nasa pawh PWD Highway Division hian zawh nuam deuh zawk tura siam that an tum thu an sawi a ni.

Serchhip District chhunga chenna in chhia leh thiah ngaite pawh Addl. DC Pu Chuauhnuna chuan, SDRF Norms in min hrilh angin tanpuina awm thei chi apiang chu pek chhuah nghal zel a nih thu a sawi a. Tunah hian loneitute thlai chhia report khawn khawm mek a nih thu a tarlang bawk.