March ni 15 kha World Consumer Rights Day a ni a, tunkar hi Consumer te dikna leh chanvo inhrilhhriatna ni fawmpahin World Consumer Rights Week atan khawvel pumah hman mek a ni a. Vawiin khan he Week pual hian Mizoram Consumers’ Union (MCU) Headquarters Aizawl leh Consumer Club, Govt. Johnson College chuan Govt. Johnson College-ah programme an buatsaih a. He programme hi Food, Civil Supplies & Consumer Affairs Minister Pu John Rotluangliana'n a hmanpui a ni.

Pu John Rotluangliana chuan World Consumer Rights Week hi mitin ta a ni a, mi tupawh, eng hnathawk pawhin man chawi a thil leiin a hman a ngai a, chuvangin damchhung hian consumer kan ni reng dawn a, kan dikna leh chanvo te ka hriat a, chungte chu midang kan hrilhhriat leh kan puanzar hi consumer te mawhphurna lian tak a ni, a ti a. Mizote hi kan ngaih a sam a, kan dil chhut lem lova, thil kan chik lova mahse tunlai khawvel ang ah chuan hetiang ching hnam hi hnam ropui leh puitling leh mahni dikna hria hnam tia hriat an ni a, chuvangin consumer chungchang thil ah a ni emaw, kan nitin nunah a ni emaw, thil kan chhut a, kan chik a, kan dikna leh chanvo te kan hriatna lamah kan harh a pawimawhin a tul hle a ni, a ti.

Minister chuan Consumer te dikna leh chanvo humhimna kawngah Mizoram Consumers’ Union chuan nasa taka hma lain consumer te hmakhua ngaihtuahin thahnemngai takin hna an thawk a, an inpekna hi a fakawmin a ropui a, an thahnemngaihna kan hriat a, consumer te min ngaihsak a ni tih kan hriat hi a pawimawh a ni, a ti a. Kan dikna leh chanvo te palzut nia kan hriat chuan phun lungawi mai lova, a zualko na hmun Consumer Union ah te, District Consumer Forum ah te kan lungawiloh nate thlen nachang kan hriat a hun tawh hle a, consumer te tana ding Consumer Forum te hi engtik lai pawhin consumer te puih an in huamin an in hawng reng a ni tih kan hriat pawh a pawimawh hle in ka hria a ni, a ti bawk.

He hun hmanpuitu dang Food, Civil Supplies & Consumer Affairs Department, Additional Director Pu C. Zasanga pawhin thusawiin tunlai consumer leh mipuiin an buaipui em em Direct Benefit Transfer of LPG (DBTL) Scheme chungchanga hriattur pawimawhte leh tul te a tarlang a. Dr. Chawngsailova, General Secretary, MCU chuan consumer te dikna leh chanvo humhimna(protection) chungchangah thu hmahruai a sawi a. Ei leh in tha (Healthy Food), inbiakpawhna(Telecom) leh LPG Services chungchangah zawhna leh chhanna hun hman a ni bawk.