Fire Department chuan a hnuai ami ang hian mipuite hnenah hriattirna leh ngenna a chhuah.

Kan hriat theuh angin Mizoram chhungah kum tinin thal laiin khawchhung leh ram-ah kangmei chhuak a tam zual thin a, In leh bungrua hlu tak tak te, thing leh mau, nungcha leh ramsa, mihring nunna thlengin kan chanin kan hloh phah fo thin a, a pawi tak zet a ni.

Kangmei chhuak tam ber hi fimkhur tawk loh avanga thleng thin a ni. Electric bungrua(appliance) hman fimkhur tawk loh avangte, a hman dan dik lova hman thin avangte pawhin kangmei a chhuak fo thin a. In bul huan leh lo/leipui haltuten fimkhur lo leh meikawng sial mumal lova an hal thin avangte-in kangmei a chhuak fo bawk thin. Fimkhur lo leh inthlahdah avanga kangmei tichhuaktute hi Dan hmanga hrem theih pawh an ni bawk.

Chenna in a luahtute awm loh laia kang thin hi a pawi fe hnu/a kan nasat hnua hmuh leh hriat a ni tlangpui thin a. Hetiang hunah in chhungah nasa takin mei a lo in mung a, engemaw chen hnuah a lo alh chhuak hluai(Flashover) thin a. A bul hnaia mite tana thelh theih loh khawpin a awm nghal a. Rang taka thelh mih a nih loh chuan a in pum a kan bakah thenawm in hnai te a man kai thuai thin a ni. A bul hnai in dang kang tur ven mai loh chu Kangthelh Pawl tan pawh tih vak ngaihna a awm tawh thin lo.

Hetianga kangmei a lo chhuah chang hian mipui lam atanga thahnemngaihna aw ka a lo ri chhuak thuai thin a. Heng kan thahnemngaihna aw ka lo chhuak hian thu chiang hre hmasa lova Fire Service te dem mai an ching thin hi a pawi hle a ni, Fire Service a thawk ten an bungraw neih chhun ang angin theihtawpin an bei ve tak meuh meuh a, an hnathawh that ve lam mangnghilh a indemna lam thu sawi chin hi thil hriatchian hmasak tawk loh vang a ni thin a. Chuvangin thu chiang leh a chhan leh vang hre hmasa lo chuan thuthang (rumor) hi thehdarh lo turin mipui kan in ngen tak meuh a ni. Kangthelh Motor te hi mi ram angin hmun hrang hrang(strategic location) ah dah vek hi sawrkarin duh mahse tun dinhmunah dah theih vek a la ni lova. Kan neih ang ang te tangkai taka hman mai rih hi kan tlin tawk a ni rih a.

Kangthelh motor te hian Tui hi an Tanky len dan a zirin 800 litres atanga 3200 litres te a phur thin a. An tui pump chhuah chak zawng hi 1100 - 1250 litres per minute a ni tlangpui a. A tui phurhte hi minute reilote chhungin a phuh zo mai thin a ni. Chuvangin mipuite pawhin kan theih ang tawka kan thawhpui a ngai fo thin a ni. Staff indaih lohna a nasat avangin Fire & Emergency Services lam pawhin harsatna nasa tak a tawk mek bawk a. Hetiang hi kan dinhmun a nih avangin mipui lam te kan fimkhur lehzual a pawimawh em em a, in dem mai lovin mahni In leh Lo leh nitin a kan chet velna kawng hrang hrangah kangmei chhuak lo tura fimkhur turin mitin kan in hriattirin kan in ngen tak zet a ni.