Pu John Siamkunga, Chairman, Mizoram State Law Commission chuan tukin zing khan Denlunga Pasaltha Mual siamna tur hmunah lungphum a phum a, hemi hnu hian Greater Hnahthial Water Supply Scheme (GHWSS) pumping site Tuichang a tlawh bawk.

Pasaltha mual Lungphum phumna inkhawm tawi hi a hmunah neih niin khuallian Pu John Siamkunga chuan Mizoram tana ro tling tura buatsaih a nih tur thu a sawi. Tlawm ve lo Lalnu Ropuiliani lalna leh lu nghahna hmun Denlung ram ngei a hetiang hmun ruahman a ni thei chu lawmawm tiin local tourist mai bakah foreign tourist thlenga tlawh chakawm tura siam a nih theih a beisei thu a sawi a, chumi tur chuan tan tlan a tul hle dawn a ni a ti a. Pasaltha Mual chhehvel a ram ngaw tha tak awm chu eco tourism atan duhthusam a ni a ti a, design leh plan mumal tak siamin, chumi mil chuan theih tawpa hma lak tum a ni a, Pawl Kut chu helai hmunah ngei hian ropui taka hman tum a ni, a ti bawk.

Pasaltha Mual tur hi hmun hma a tha hle a, tin 5 hmun aia zau mah a ni thu Working Chairman Pu F. Lalchhuanawma chuan a sawi a ni.

Hemi hnu hian Greater Hnahthial Water Supply Scheme (GHWSS) pumping site Tuichang a tlawh leh a. Inkhawm tawi buatsaihah Pu John-a chuan Aizawl Greater Water Supply Scheme pawh committee pawimawha a tel avangin a tlawh fo tawh thu leh sum hman dinhmun khaikhinin tun ami chu ropui tak a ni, a ti a. Sorkar hmasa ah Tuichang hi pump tumna a awm lova, hmun dang daih atanga gravity-a lak tum niin chu chu thalo zawk dawna a lan avangin pump a nih ngei theih nan tan a lak dan Law Commission Chairman hian a sawi a, estimate te thlakin pump tura tih a ni leh ta zawk a ni, a ti bawk.

GHWSS hi peih thawkhat a ni tawh a, a enchhinna te pawh Pu C. Lalhmahruaia, Executive Engineer hovin an lo nei tawh a ni.