January 17, 2015(Inrinni) khan S. Tuipui bialtu MLA Pu John Siamkunga Law Commission Chairman ni bawk chuan BADP sum Rs. 15 lakhs senga sak, S. Vanlaiphai Community Hall, a hawng a. Hemi rual hian Soil & Water Conservation leh Horticulture department hnuaia NLUP tanpuina dawngtu chhungkaw 195 te hnenah tanpuina sum a sem nghal bawk.

Hall hawnna inkhawmah John Siamkunga chuan, sawrkar duhsakna S.Vanlaiphai khua in hall tha tak a lo nei ta chu lawmawm a tih thu sawiin, khawtlang mipui ten neitu an ni tih inhria a, duat taka enkawl turin a chah a. NLUP tanpuina dawngtute chu an sum dawn te a nihna tur dik taka hmang tura fuihin rinawm leh taima taka hma latu te chuan NLUP chu anmahni chawm lettu ah an la ni hmang thei dawn a ni, a ti a. Sawrkar duhdan ang ngeia chhungkaw eizawnna tih puitlin nan NLUP chu hlawhtlinpui ngei tura tan la turin a fuih a ni.

Pu John Siamkunga hian vawiin khan Hnahthial Bazar Building-ah Trade hrang hrang hnuaia NLUP dawngtute hnenah tanpuina sum a sem bawk a ni.